Украина уруши: Россия асосий кучларини қаерга йўналтиргани маълум қилинди

Россия қўшинлари асосий эътиборни Киев, Харьков шаҳарларини қамал қилиш ва босиб олинган Қрим билан қуруқлик йўлаги яратишга қаратмоқда. Бу ҳақда Украина Қуролли Кучлари Бош штаби маълум қилди.

Бош штаб маълумотларига кўра, рус қўшинларининг асосий ҳаракатлари шаҳарлар ва Харьковни ўраб олишга қаратилган. Россия томони Луганск ва Донецк вилоятларининг маъмурий чегараларига чиқиб, келажакда босиб олинган Қрим билан қуруқлик йўлаги яратиш ниятида.

Шунингдек, Полесьеда рус бўлинмалари Бородянка ҳудудидаги йўлларни тўсиш учун муҳандислик ишларини бошлаган. Шибене ва Катюжанка ҳудудларида бўлинмалар тўхтатилди.

“Россия Қуролли Кучлари Харьков ва Мариуполь томон ҳаракат қилаётган олдинги отрядлари таркибида вақтинча ишғол қилинган Донецк ва Луганск вилоятларидан сафарбарлик ресурсидан фойдаланмоқда.

Таврид томондан рус бўлинмалари Запороже йўналиши бўйича ҳужумни давом эттиришга ҳаракат қилмоқда ва Россия Қуролли Кучлари Ғарбий ҳарбий округининг қўшма қуролли армияси бўлинмалари Харьковни айланиб ўтиб, жануби-ғарбий йўналишда ҳаракатланишга ҳаракат қилмоқдалар”, дейилади Бош штаб баёнотида.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.