Украина ўлдирилган ва асирга олинган 550 нафар рус ҳарбийларининг шахсини аниқлади

Киев Украинага ҳужум қилган Россиялик ҳарбийларнинг ҳалок бўлганлари ва асирга тушганларидан 550 нафарининг шахсини аллақачон аниқлаган. Бу ҳақда Украина телеканалларида ўтказилган телемарафонда маълум қилинди. 

Украинага қарши урушда қатнашган бу ҳарбийлар ҳақидаги маълумотлар аллақачон ягона реестрга киритилган. 

Украина ҳукумати украиналикларни ва бунга қодир бўлган барчани қурбон бўлган ва асирга олинган аскарлар ҳақидаги маълумотларни Россия фуқаролари ўртасида тарқатишга ҳамда уларнинг оилаларига етказишга чақирмоқда. 

Украина Махсус алоқа ва ахборотни муҳофаза қилиш давлат хизматига кўра, 24 февралдан 5 мартгача душманнинг умумий жанговар йўқотишлари тахминан 10 минг нафардан ортиқ шахсий таркибни ташкил қилган.

Айни урушнинг ўнинчи куни давом этмоқда. 

Украина мудофаа вазири Олексий Резниковнинг таъкидлашича, Украинада душман қўшинларининг ҳарбий ресурслари тугайди, кейин логистика инқирози юз беради.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.