Украина Харьков учун жангда Россияни енгдими? 

Россия ҳарбийлари Харьков атрофидаги позицияларини бутунлай тарк этишга қарор қилди. Бу ҳақда Америка Урушни ўрганиш институти ҳисоботида айтилган. 

Таҳлилчиларга кўра, сўнгги кунларда Харьков яқинидаги рус бўлинмалари Украина қўшинларининг қарши ҳужумлари фонида ўз позицияларини сақлаб қолишга ҳаракат қилмаган — расмий Москва шаҳар яқинида позицияларни эгаллашга уринишдан кўра, ўз бўлинмаларини тартибли равишда олиб чиқишга эътибор қаратган.

Экспертларнинг ёзишича, Украина русларнинг шаҳарни ўраб олиши ёки эгаллашига тўсқинлик қилиб, Харьков учун жангда ғалаба қозонган бўлиши мумкин. Таҳлилчилар рус ҳарбийларининг бу чекинишини март ойининг охирида уларнинг Киевдан чиқиб кетиши билан солиштирган. 

Ҳозирда рус қўшинларининг асосий ҳаракатлари Северодонецк ва Лисичанскни шимолдан ва жанубдан ўраб олишга қаратилган. 

Маълумот ўрнида, Харьков Россия билан чегарадан 25 километр узоқликда жойлашган. Рус қўшинлари урушнинг биринчи кунида шаҳарга яқинлашган, аммо уни ҳеч қачон ўз назорати остига ололмаган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.