Трамп президентликка қайтса, Байденга қарши тергов бошлашга ваъда берди

АҚШнинг собиқ президенти Дональд Трамп агар давлат раҳбари лавозимига қайта сайланса, зудлик билан мамлакатнинг амалдаги етакчиси Жо Байден ва унинг оиласи устидан тергов бошлашини айтди. Бу ҳақда у Жанубий Каролинада Республикачилар партияси тарафдорлари учун ўтказилган тадбирда гапириб ўтган.

“АҚШ президенти сифатида биринчи кунимда мен махсус маслаҳатчига АҚШ Конгрессида барча номақбул ҳаракатлар, жумладан, Хитой ва бошқа кўплаб мамлакатлардан пора олиш бўйича илгари сурилган кўплаб айбловларнинг ҳар бирини кўриб чиқишни топшираман", дея иддао қилган у.

Трампнинг даъво қилишича, бу ушбу давлатлардан олинган пуллар тўғридан-тўғри Байден оиласининг чўнтагига тушган.

Эслатиб ўтамиз, аввалроқ АҚШ собиқ президенти Дональд Трамп 561 йилга озодликдан маҳрум қилиниши мумкинлиги ҳақида хабар бергандик. Унга учта жиноий иш бўйича жами 78 та, шунингдек, 2020 йилги сайловларни сохталаштириш каби айбловлар қўйилган. 

Маълумот учун, Трампга нисбатан бундан олдин ҳам унинг тарафдорлари томонидан Капитолийга уюштирилган ҳужум бўйича жиноят иши қўзғатилган эди. Бу воқеа собиқ президент сайловда Байденга ютқазганидан сўнг, 2021 йилнинг 6 январида содир бўлган.

Дональд Трамп, шунингдек , Оқ уйни тарк этганидан кейин АҚШ ядровий дастурига оид ўнлаб қутилардаги махфий ҳужжатларни ўзи билан Мар-а-Лагодаги мулкига олиб кетгани юзасидан 40 та федерал айблов бўйича қўшимча юридик муаммоларга дуч келмоқда. 

2016 йилда собиқ президентнинг порноактриса Сторми Дэниелсга ишқий муносабатларини ошкор қилмаслиги учун пул бергани ҳақидаги даъво бўйича Манхеттен округи прокурорининг 34 та айблови ҳам Дональд Трампга қаратилган. 

Бундан ташқари, у 2020 йилда Жоржия штати Фултон округидаги сайловларга аралашганликда ҳам гумонланмоқда.

Дональд Трампга нисбатан иш очилгач, у АҚШ тарихида жиноий жавобгарликка тортилган илк президент бўлганди. Трампга қўйилган айбловлар 2024 йилги президентлик сайловларида унинг имкониятларини ошириб юбориши айтилганди. 4 апрель куни эса у ҳибсга олиниб, бироздан сўнг қўйиб юборилган.