Трамп 1 йилда 1 млн мигрантни депортация қилмоқчи – WP

АҚШ Президенти Дональд Трамп маъмурияти президентлигининг биринчи йилида 1 миллионгача муҳожирни депортация қилмоқчи. Бу ҳақда “The Washington Post” собиқ ва амалдаги федерал амалдорларга таяниб хабар берди.

Бир йил ичида 400 мингдан ортиқ депортация бўйича аввалги рекорд 2009 йилнинг январидан 2017 йилнинг январигача бўлган 44-президент Барак Обама даврида ўрнатилган эди.

north_east

Трамп маъмурияти айрим шахсларга грин-карта беришни тўхтатди 

Президент маслаҳатчиси Стивен Миллер бу масалани деярли ҳар куни Ички хавфсизлик департаменти ва бошқа федерал идораларнинг расмийлари билан муҳокама қилмоқда. Нашр манбаларига кўра, улар тегишли фармойиш чиқарилган 1,4 миллион кишининг бир қисмини депортация қилиш йўлини топмоқчи, бироқ уларни қайтариб юборишнинг иложи йўқ, чунки уларнинг ватанлари бу одамларни ортга қайтармайди.

Вашингтон учинчи давлатларга депортация қилинганларни қабул қилиш бўйича ҳам музокаралар олиб бормоқда. Трамп Оқ уйга қайтганидан кейинги дастлабки кунларда Мексика, Коста-Рика ва Панама АҚШдан чиқариб юборилган Ҳиндистон, Марказий Осиё, Хитой, Афғонистон, Россия ва бошқа давлатлар фуқароларини қабул қилишга рози бўлди.

Сайлов кампанияси давомида Трамп миллионлаб ноқонуний муҳожирларни депортация қилмоқчи эканини айтганди, бироқ таҳлилчилар бу мақсадни реал эмас деб ҳисоблаб, етарлича маблағ йўқлиги, кадрлар етишмаслиги ва кўпчилик муҳожирлар (жумладан, жиноятда айбланганлар) судга мурожаат қилиш ҳуқуқига эга эканини таъкидлаганди.

“АҚШнинг Кубадаги Гуантанамо ҳарбий базасидаги ҳибсхонага жўнатилганлар мамлакатда ноқонуний бўлганларнинг фақат кичик бир қисми”, дея таъкидлайди газета.

Молиявий ва ҳуқуқий тўсиқлардан ташқари, иммиграция расмийлари Оқ уйнинг доимий танқидига дуч келмоқда. Қанча одам депортация қилинганини кузатиш қийин, чунки Трамп маъмурияти Ички хавфсизлик статистикаси идорасининг ойлик ҳисоботларини чиқаришни тўхтатди. Ички хавфсизлик департаменти матбуот котиби Триша Маклафлиннинг сўзларига кўра, жорий йилнинг март ойи охиригача АҚШдан 100 мингдан ортиқ муҳожир депортация қилинган. Унинг таъкидлашича, бу рақамга мамлакат ичида ҳибсга олинганлар ҳам, чегарада қўлга олинганлар ҳам киради, лекин ўзлари чиқиб кетганлар эмас. Март ойида Трамп маъмурияти ҳужжатсиз муҳожирларга ҳибсга олиш ва ҳибсга олинмаслик учун Қўшма Штатларни мустақил равишда тарк этиш имконини берувчи мобил иловани ишга туширди.

Анъанага кўра, депортация қилинганларнинг аксарияти чегарани ноқонуний кесиб ўтганлардир. Трамп чегарани қўриқлаш учун қўшин юборганидан кейин уларнинг сони кескин камайди.

Эслатиб ўтамиз, аввалроқ АҚШ ўзбекистонлик муҳожирларни ҳарбий самолётда Панамага депортация қилганди. Коста Рикага депортация қилиниши режалаштирилган Ўзбекистон фуқаролари эса Тошкентга қайтарилганди.