Temu Ўзбекистонга 46 млрд сўмлик солиқ тўламаган – Солиқ қўмитаси

Хитойга тегишли бўлган Temu маркетплейси Ўзбекистонга тахминан 46 млрд сўм миқдорида солиқ тўламаган. Бу ҳақда бугун, 1 апрель куни АОКАда ўтказилган матбуот анжуманида Солиқ қўмитаси раисининг биринчи ўринбосари Мубин Мирзаев маълум қилди.

Мирзаев ушбу электрон савдо тизимини солиққа тортиш бутун дунёда муаммога сабаб бўлаётганини қайд этди. Шунингдек, у барча электрон платформаларга солиқ мажбурияти бўйича огоҳлантириш хати берилганини таъкидлади.

“Дастлабки ҳисоб-китоблар натижасида Temu томонидан тахминан 46 млрд сўмлик солиқлар тўланмагани аниқланди. Маркетплейсга ушбу солиқ тўловлари бўйича эътироз хати берилган. Қачон у солиқларни тўласа, биз фаолиятини легаллаштириш имкониятини яратиб берамиз”, деган Мирзаев.

Шу билан бирга, Мирзаев ҳисобланган солиқлар текширилмаганини, солиқ қарздорлиги тўланмаган ҳолатда, тўлиқ тартибда текширув амалга оширилишини ҳамда солиқ мажбурияти бажарилиши юзасидан алоҳида маълумотлар тақдим этилишини қўшимча қилган.

Маълумот учун, Ўзбекистонда 2024 йил охирида электрон тижорат учун янги қоидалар жорий қилинди. 28 декабрдан бошлаб мамлакатда фаолият юритадиган халқаро платформалар юридик шахс сифатида рўйхатдан ўтиши шарт бўлди. Аммо Temu бошида бу талабни эътиборсиз қолдирди. Март ойида эса Temu Ўзбекистонда юридик шахс сифатида рўйхатдан ўтди. 20 март куни эса маркетплейс Ўзбекистондаги фаолияти давомида қўшилган қиймат солиғини (ҚҚС) тўламагани учун блокланди.