Temu O‘zbekistonga 46 mlrd so‘mlik soliq to‘lamagan – Soliq qo‘mitasi

Xitoyga tegishli bo‘lgan Temu marketpleysi O‘zbekistonga taxminan 46 mlrd so‘m miqdorida soliq to‘lamagan. Bu haqda bugun, 1 aprel kuni AOKAda o‘tkazilgan matbuot anjumanida Soliq qo‘mitasi raisining birinchi o‘rinbosari Mubin Mirzayev ma’lum qildi.

Mirzayev ushbu elektron savdo tizimini soliqqa tortish butun dunyoda muammoga sabab bo‘layotganini qayd etdi. Shuningdek, u barcha elektron platformalarga soliq majburiyati bo‘yicha ogohlantirish xati berilganini ta’kidladi.

“Dastlabki hisob-kitoblar natijasida Temu tomonidan taxminan 46 mlrd so‘mlik soliqlar to‘lanmagani aniqlandi. Marketpleysga ushbu soliq to‘lovlari bo‘yicha e’tiroz xati berilgan. Qachon u soliqlarni to‘lasa, biz faoliyatini legallashtirish imkoniyatini yaratib beramiz”, degan Mirzayev.

Shu bilan birga, Mirzayev hisoblangan soliqlar tekshirilmaganini, soliq qarzdorligi to‘lanmagan holatda, to‘liq tartibda tekshiruv amalga oshirilishini hamda soliq majburiyati bajarilishi yuzasidan alohida ma’lumotlar taqdim etilishini qo‘shimcha qilgan.

Ma’lumot uchun, O‘zbekistonda 2024 yil oxirida elektron tijorat uchun yangi qoidalar joriy qilindi. 28 dekabrdan boshlab mamlakatda faoliyat yuritadigan xalqaro platformalar yuridik shaxs sifatida ro‘yxatdan o‘tishi shart bo‘ldi. Ammo Temu boshida bu talabni e’tiborsiz qoldirdi. Mart oyida esa Temu O‘zbekistonda yuridik shaxs sifatida ro‘yxatdan o‘tdi. 20 mart kuni esa marketpleys O‘zbekistondagi faoliyati davomida qo‘shilgan qiymat solig‘ini (QQS) to‘lamagani uchun bloklandi.