Суд Трамп божларини бекор қилди

Кеча, 29 август куни АҚШ Федерал апелляция суди Президент Дональд Трамп томонидан жорий этилган кўплаб божларни бекор қилди. Бу ҳақда CNN хабар берди.

Суд қарорига кўра, “Халқаро фавқулодда иқтисодий ваколатлар тўғрисида”ги қонун Трамп қўллаган божларни жорий этишга рухсат бермайди. Бундан кўринадики, Президент қонундан нотўғри мақсадда фойдаланган. Федерал округ апелляция суди ҳам қуйи инстанция судининг Трамп божларини ноқонуний деб топган қарорини қўллаб-қувватлаган.

Судга кўра, Президент жорий қилган “мислсиз тарифлар” Трамп ваколатларини ошириб юборганини кўрсатади. Чунки солиқ ва божларни жорий этиш ҳуқуқи АҚШ Конституциясига кўра, Конгрессга берилган асосий ваколатдир.

Шу билан бирга, божлар ҳозирча кучда қолмоқда. Чунки суд ўз қарорини ижро этишни жорий йил октябргача кечиктирган. Бу эса Трамп маъмуриятига Олий судга апелляция киритиш имконини беради ва бу қарор ҳам ишламай туриб бекор бўлиши мумкин. 

Дональд Трамп 29 август куни кечқурун ижтимоий тармоқларда барча божлар кучда экани ҳақида эслатиб ўтган. 

“Барча божлар кучда! Агар бу божлар қачондир бекор қилинса, бу мамлакатимиз учун тўлиқ фалокат бўлади”, дея ёзган Оқ уй раҳбари. 

АҚШ Молия вазири Скотт Бессант ҳам божларни бекор қилиш Трамп маъмуриятини “хавфли муаммога” олиб келиши, мавжуд музокараларга зарар етказиши ва бошқа давлатлар томонидан жавоб чораларига сабаб бўлиши мумкинлигини таъкидлаган. 

Худди шунингдек, АҚШ Савдо вазири Говард Лютник ҳам суд қарори Трампга қарши қабул қилингани учун АҚШ манфаатларига “зарар” келтиришини ва Трамп эълон қилган бир қатор савдо битимлари, жумладан Европа Иттифоқи, Буюк Британия ва Япония билан имзоланган келишувларни хавф остига қўйишини айтган.

Бироқ суд аъзолари ушбу қарорни Трампнинг президентлик ваколатларига жиддий чеклов сифатида баҳолаган. Уларга кўра, Трамп ўз ваколатларини “чексиз” деб ҳисоблаган бир пайтда, суд қарори буни рад этиб, Президентга чегарасини кўрсатиб қўяди. 

АҚШ Бош прокурори Пэм Бондининг билдиришича, Трамп маъмурияти ушбу қарор устидан Олий судга апелляция киритади.

Иш Федерал апелляция суди кенгайтирилган таркибида кўриб чиқилган. Етти судья Трамп қарорига қарши чиққан, тўрт судья эса қарши фикр билдирган.

Эслатиб ўтамиз, жорий йилнинг 27 август кунидан бошлаб АҚШ Ҳиндистондан олиб кириладиган маҳсулотларга 50 фоизлик бож жорий қилганди. Бу божлар Ҳиндистоннинг Россия билан савдо қилаётгани учун жорий этилган. Ҳиндистоннинг ўзи эса Трампнинг божларини қоралаган ва уларга бож жорий қилаётганларнинг ўзи ҳам Россия билан савдо алоқаларини узмаганини таъкидлаган.