Словакия конституциясида фақат 2 жинс тан олиниши белгиланди

Словакия Президенти Петер Пеллегрини мамлакат конституциясида фақат икки жинс – эркак ва аёлни тан олишни мустаҳкамловчи тузатишларни имзолади. Бу ҳақда у бугун, 30 сентябрь куни ўзининг Facebook саҳифасида маълум қилди.

Қайд этилишича, жорий йилнинг 26 сентябрь куни Словакия парламенти учинчи – якуний ўқишда ушбу тузатишларни қабул қилган. Уни 150 депутатдан 90 нафари қўллаб-қувватлаган. Шу тариқа ҳужжат Президентга имзолаш учун юборилган.

“Бугун мен конституцияга киритилган ва 90 депутат овози билан қабул қилинган тузатишларни имзоладим”, дейди Пеллегрини.

Маълумот учун, жорий йилнинг январь ойида Словакия Бош вазири Роберт Фицо мамлакат конституциясида фақат икки жинс – эркак ва аёлни тан олиш ҳақидаги қоидани мустаҳкамлаш режалари ҳақида гапирганди. Унга кўра, ҳеч ким ўзини “вертолёт, мушук ёки ит” деб эълон қилмаслиги керак. Шу ташаббус доирасида энди конституцияда фақат никоҳда бўлган анъанавий жуфтликлар асраб олиши мумкинлиги ҳам белгилаб қўйилди. Бунда 2014 йилдаёқ никоҳ эркак ва аёл иттифоқи сифатида мустаҳкамлангани қайд этилган эди.

Эслатиб ўтамиз, жорий йилнинг март ойида АҚШ Президенти Дональд Трамп мамлакатда ва бутун дунёда “соғлом фикр инқилоби”ни эълон қилиб, АҚШда фақат иккита жинс – эркак ва аёл тан олинишини айтганди.