Россиянинг Донецкга ҳужуми ўз аскарларини сурбетларча ўлдиришдир – Зеленский

Россиянинг Украинанинг Донецк вилоятига ҳужумлари урушлар тарихига ўз аскарларини сурбетларча ўлдириш сифатида киради. Бу ҳақда Украина Президенти Владимир Зеленский кеча, 26 сентябрь куни анъанавий видеомурожаатида айтиб ўтди.

“Урушнинг Россия учун бемаънилиги ва босқинчилар ташаббусни йўқотганига қарамай, рус армияси қўмондонлиги уларни ҳали ҳам ўлимга юборяпти. Россиянинг Донецк вилоятига доимий ҳужум қилишга уринишлари, шубҳасиз, урушлар тарихига ўз аскарларини энг беадаблик билан ўлдириш бири сифатида киради”, дейди давлат раҳбари.

Зеленскийнинг таъкидлашича, у бундай ҳужумларни кўриб, “Россия сафарбарлиги фронтдаги қўмондонларга доимий аскарлар оқиминигина беришга очиқ уриниш эканлигига яна бир бор исботлайди.

“Улар ютқазишёатганини ҳис қилишяпти ва шунчаки бу лаҳзани чўзишга уриняпти, фронтда ҳеч бўлмаганда қандайдир фаолликни таъминлашга, ўлганлар ўрнига ҳеч бўлмаганда қўлларида қуролли одамни қўйишга ҳаракат қилмоқдалар”, дейди Президент.

Украина раҳбарининг таъкидлашича, афсуски, “Россия жамияти ҳали Россия ҳукуматининг ўз халқига нисбатан шафқатсизлигидан хабардор эмас”.

“Аммо биз Россиянинг ҳар бир фуқароси ўз давлати уни энг муҳим нарса – яшаш ҳуқуқидан маҳрум қилаётганини тан олиши учун ҳамма нарсани қилишимиз керак”, дея қўшимча қилди Зеленский.

Эслатиб ўтамиз, 21 сентябрь куни Россияда сафарбарлик бошланди. Россия Президенти Владимир Путиннинг сўзларига кўра, резервда бўлган ва тегишли ҳарбий мутахассислик ва жанговар тажрибага эга фуқаролар муддатли ҳарбий хизматга чақирилади.

Ҳукумат порталида 35 ёшгача бўлган оддий аскар ва сержантлар, 50 ёшгача бўлган кичик офицерлар, 55 ёшгача бўлган катта офицерлар биринчи навбатда сафарбар қилиниши айтилган. Сафарбарлик ортидан россияликлар оммавий равишда ватанини ташлаб, хорижий давлатларга чиқиб кетишни бошлади.

Шойгунинг сўзларига кўра, сафарбарлик доирасида 300 минг кишини армияга олиш режалаштирилган. Шунингдек, Россия охирги 10 йилда фуқароликка қабул қилинган марказий осиёликларни ҳам ҳарбий хизматга жалб қилмоқчи экани ҳақида хабар берган эдик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди.