Россияга тотал уруш эълон қилишди – Лавров

Россияга қарши кенг кўламли уруш эълон қилинди, Ғарб ўз сиёсатининг мақсадлари Россия иқтисодиётини бўғиш ва йўқ қилиш эканини яширмаяпти. Бу ҳақда бугун, 25 март куни Россия Ташқи ишлар вазири Сергей Лавров Александр Горчаков номидаги халқ дипломатиясини қўллаб-қувватлаш жамғармаси бошқаруви йиғилишида айтиб ўтди.

“Бугун бизга ҳақиқий гибрид уруш эълон қилишди. “Тотал уруш” – нацистлар Германияси томонидан қўлланилган бу атама энди кўплаб европалик сиёсатчилар томонидан Россия Федерацияси билан нима қилишни хоҳлашлари ҳақида гапирганда қўлланиляпти. Мақсадлар яширин эмас, улар оммавий равишда эълон қилиняпти – Россия иқтисодиётини ва бутун Россияни йўқ қилиш, синдириш, бўғиш”, дея таъкидлаган ТИВ раҳбари.

Вазирнинг сўзларига кўра, ушбу “санкциялар бошбошдоқлиги”да Ғарб давлатларининг Россияга тарғиб қилган барча қадриятлари - сўз эркинлиги, бозор иқтисодиёти, хусусий мулк дахлсизлиги, айбсизлик презумпцияси - ҳеч қандай қийматга эга эмаслиги аён бўлган.

Вазирнинг сўзларига кўра, бундай босимга қарамай, Ғарб давлатлари томонидан БМТга тақдим этилган “провокацион ташвиқот матнлари”га эмас, балки савдо-иқтисодий алоқаларнинг ҳақиқий ҳолатига эътибор қаратиш лозим.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.