Россияда коронавирусга қарши эмлаш бошланди

Россиянинг барча ҳудудларидаги коронавирусга қарши эмлаш билан шуғулланадиган тиббиёт муассасаларида вакцинация ишлари бошланди. Бу ҳақда Россия Соғлиқни сақлаш вазири Михаил Мурашко бугун, 15 декабрь куни Ҳукуматнинг коронавирусга қарши кураш бўйича мувофиқлаштирувчи кенгаши президиумида маълум қилди.

“Ҳозирги кунда эмлаш билан шуғулланадиган тиббиёт ташкилотларининг умумий сони 1229 танини ташкил этмоқда”, дейди вазир.

Мурашконинг сўзларига кўра, Россиянинг 90 га яқин тиббиёт ташкилотлари коронавирусга қарши вакцинанинг улгуржи партиясини янада кенгроқ тарқатиш учун қабул қилади.

“Жами 89 та тиббиёт ташкилоти бутун Россия бўйлаб жойлашган бўлиб, улар вакцинанинг улгуржи партиясини тўғридан-тўғри ўз минтақалари ичида кенгроқ тарқатиш учун қабул қилиб олишди”, дейди у.

Вазирнинг сўларига кўра, Россия Федерацияси Соғлиқни сақлаш вазирлиги коронавирусга қарши эмланган фуқароларнинг реэстрини юритади, унда 28,5 минг кишининг рўйхати бор. Маълум бўлишича, “Биокад” компанияси “Спутник V” вакцинасини ишлаб чиқариш учун гувоҳнома олган.

Эслатиб ўтамиз, 4 декабрь куни Тошкентга Россиянинг коронавирусга қарши “Cпутник V” вакцинаси намуналари олиб келинди. Намуналар Ўзбекистонга рўйхатдан ўтказиш олдидан тегишли синовларни олиб бориш ва мамлакатда вакцина ишлаб чиқаришга старт бериш учун тақдим этилган.