Россия ўнга яқин юнон дипломатини қувди

Олам 6831
image

Россия Ташқи ишлар вазирлиги Грециянинг саккиз нафар дипломатини “персона нон грата” деб эълон қилди. Бу ҳақда РИА Новости хабар берди.

Қайд этилишича, бугун, 27 июнь куни Грециянинг Москвадаги элчиси Екатерина Нассика Россия Ташқи ишлар вазирлигига чақирилган. Унга ўз давлати расмийларининг Москвага нисбатан қарама-қаршилик йўналиши муносабати билан қаттиқ норозилик билдирилган. Хусусан, Киев режимига қурол-яроғ ва ҳарбий техника етказиб берилиши, Грециядаги бир гуруҳ рус дипломатларининг “персона нон грата” деб эълон қилиниши танқид қилинган.

“Элчига Россиядаги саккиз нафар Греция дипломатик ходими “персона нон грата” деб эълон қилингани ва улар саккиз кун ичида мамлакатни тарк этиши кераклиги ҳақида нота топширилди”, дейилади хабарда.

Маълумот учун, 6 апрель куни Греция россиялик 12 дипломатни чиқариб юборди. Бугун, 27 июнь куни эрталаб эса Россиянинг Грециядаги элчиси Андрей Маслов Греция расмийлари элчихона ва бош консуллик билан алоқаларни тўхтатганини маълум қилди. Унинг қўшимча қилишича, шу сабабли дипломатлар россияликларга консуллик ёрдами кўрсатишда қийинчиликларга дуч келмоқда.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Юлдуз Абдурашидова
Мақолага баҳо беринг
Баҳолаганлар: 9
Рейтинг: 3.6
t
×