Россия Украинанинг қурол омборини “Калибр” билан урди

Олам 11422
image
-

Россия Қуролли Кучлари “Калибр” қанотли ракеталари ёрдамида Львов вилоятида НАТО давлатлари томонидан Украинага етказилган қуроллар учун ўқ-дорилар омборини йўқ қилди. Бу ҳақда бугун, 15 июнь куни Россия Федерацияси Мудофаа вазирлиги расмий вакили, генерал-лейтенант Игорь Конашенков маълум қилди.

“Львов вилояти, Золочев аҳоли пункти яқинида юқори аниқликдаги узоқ масофали “Калибр” ракеталари Украинага НАТО мамлакатлари томонидан етказиб берилган хорижий қуроллар, жумладан 155 миллиметрлик М777 гаубицалар учун ўқ-дорилар сақланётган омборини йўқ қилди”, дейди Конашенков.

“Калибр” (НАТО таснифига кўра SS-N-27 Sizzler) –Екатеринбургдаги “Новатор” конструкторлик бюроси (“Алмаз-Антей” ВКО концернининг бир қисми) томонидан ишлаб чиқилган ва серияли ишлаб чиқарилаётган Россия қанотли ракетаси.

Комплекс 2012 йилда Россия денгиз флотига фойдаланиш учун топширилган. Ракеталар Россия Қуролли Кучларининг Суриядаги ҳарбий амалиётида биринчи марта амалда қўлланган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Суннатилла Абдуллаев
Мақолага баҳо беринг
Баҳолаганлар: 36
Рейтинг: 3.1
t
×