Польша Россия билан газ шартномасини муддатидан олдин бузди

Польша ҳукумати Россия газини етказиб бериш бўйича келишувни муддатидан олдин бекор қилмоқда. Бу ҳақда Польша ҳукуматининг стратегик энергетика инфратузилмаси бўйича ваколатли вакили Пётр Наимский Польша радиоси эфирида айтиб ўтди.

2022 йил охиригача амал қиладиган келишувга кўра, Польша Россиядан йилига 10 миллион куб метргача газ олиши мумкин. Мамлакат расмийлари ушбу келишувни узайтирмасликка қарор қилган. 27 апрель куни “Газпром” Болгариянинг “Булгаргаз” компанияси ва Польшанинг PGNiG ширкатлари газ нархини Россия рублида тўлашдан бош тортгани учун газ экспортини тўхтатди.

“13 май куни Матеуш Моравецки ҳукумати Польша ҳукумати ва Россия Федерацияси ҳукумати ўртасидаги келишувни бузиш тўғрисида қарор қабул қилди. 1993 йилда имзоланган “Ямал” деб номланган шартномани. Орадан 30 йил ўтиб, айтиш мумкинки, Польша ва Россия ўртасидаги газ алоқалари йўқ бўлди”, дейди Наимский.

Маълумот ўрнида, жорий йилнинг 23 март куни Россия Президенти Владимир Путин ҳукумат ва Россия Федерацияси Марказий банкига Россия газининг Европа давлатларига етказиб берилиши учун тўловларни рублга ўтказиш бўйича топшириқ берди. Бунга Ғарб давлатларининг Украинадаги уруш ортидан Москвага қарши жорий қилган санкциялари сабаб бўлди.

Шундан сўнг, Германия канцлери Олаф Шольц ҳам Германия газни рублда сотиб олмаслигини эълон қилди. Унинг ортидан Франция Президенти Эммануэль Макрон ҳам рус газини рублдан сотиб олмаслигини айтди.

Россия Президенти Владимир Путин аввалроқ Вазирлар Маҳкамаси, Марказий банк ва “Газпром” компаниясига 31 мартгача Европа Иттифоқи мамлакатлари ва чеклов чораларини жорий қилган бошқа мамлакатларга газ етказиб бериш учун тўлов валютасини ўзгартириш бўйича чора-тадбирларни амалга оширишни топширган эди.

Шу ўринда айтиш жоизки, Россия газининг харидорлари ҳисоб-китобларни рублга ўтказиш бўйича турлича позицияни эгаллади. Германия канцлери Олаф Шольцнинг таъкидлашича, шартномаларда хорижий валюталар “асосан евро ва доллар” кўрсатилган. Германия Иқтисодиёт вазирлиги вакили Роберт Северин импорт қилувчилар шартномалар бажарилишини кафолатлашлари шартлигини таъкидлади. Италия бош вазири Марио Драги ҳисоб-китобларни рублга ўтказишни шартномаларнинг бузилиши деб атади.

Жорий йилнинг 31 март куни Путин "дўст бўлмаган" давлатларга газни рублда сотиш тартибини тасдиқлади. 

Шундан сўнг Европа Иттифоқига аъзо давлатларга Россияга қарши санкцияларни бузмаган ҳолда рус гази учун рублда тўлов қилишга рухсат берилди.

Жорий йилнинг 27 апрель куни Россиянинг "Газпром" компанияси Польша ва Болгарияга тўловни рублда амалга оширмагани учун газ етказиб беришни тўхтатиб қўйди. Орадан қарийб бир ой ўтгач, 21 май куни Россия талаби бажарилмагани сабабли Финляндияга ҳам рус гази етказиб бериш тўхтатилди.