Нетаньяху ҳам Трампни Нобель мукофотига номзод қилиб кўрсатди

Исроил Бош вазири Биньямин Нетаньяху АҚШ Президенти Дональд Трампни тинчлик бўйича Нобель мукофотига номзод қилиб кўрсатди. Бу ҳақда Нетаньяхунинг ўзи кеча, 7 июль куни кечқурун Вашингтондаги Оқ уйда давлат кечки овқатида маълум қилди.

“У биз гаплашаётганда, бир мамлакатда, бир минтақада, иккинчисида тинчликни мустаҳкамламоқда”, деди Исроил Бош вазири Америка Президенти ҳақида.

Нетаньяху Трампга Нобель қўмитасига юборган мактуб нусхасини топширди.

Кечки овқат аввалида журналистлар АҚШ Президентидан Исроил ва ҲАМАС ҳаракати ўртасида 22 ойдан бери адоват давом этаётган Ғазо секторида сулҳга эришиш борасидаги ишлар қандай кетаётгани ҳақида сўради.

“Ҳеч қандай кечикиш бор деб ўйламайман. Менимча, ҳаммаси яхши кетмоқда”, деди Трамп.

Унинг фикрича, томонлар “учрашмоқчи ва ўт очишни тўхтатмоқчи”.

Нетаньяху, ўз навбатида, Исроил Ғазо сектори устидан назоратни “доимо” сақлаб қолишини ва бу назоратни тўлиқ Фаластин маъмуриятига ўтказмаслигини айтди.

“Одамлар бу тўлақонли (Фаластин) давлат эмас, бу давлат эмас, дейишади. Бизга фарқи йўқ”, деди Исроил Бош вазири.

6 июль куни Трамп, унинг фикрича, яқин кунларда Исроил ва ҲАМАС ўртасида келишувга эришиш учун “яхши имконият” борлигини айтди.

Эслатиб ўтамиз, 10 май куни АҚШ воситачилигида Ҳиндистон ва Покистон ҳукуматлари бир неча кун давомида ракета зарбаларини алмашгандан сўнг ўт очишни тўхтатиш ва музокараларни бошлашга келишиб олганди.

Шундан сўнг Исломобод Трампни Тинчлик бўйича Нобель мукофотига расман тавсия қилиб, унинг “қатъий дипломатик аралашуви ва асосий раҳбариятини” олқишлади.

24 июнь куни Исроил ва Эрон Вашингтон босими остида ўт очишни тўхтатишга келишиб олди. Исроил ҳарбий-ҳаво кучлари 12 кундан бери Эрон ядро иншоотлари ва Ислом инқилоби қўриқчилари корпуси қўмондонлик марказларини бомбардимон қилган эди.

Эрон бунга жавобан Исроил ҳудудига зарба берди. АҚШ 22 июнга ўтар кечаси Эроннинг Фордо, Натанз ва Исфаҳондаги ядровий иншоотларига зарба бериб, можарога киришди.

Операциянинг расмий мақсади Эроннинг атом бомбасини яратишининг олдини олиш эди. Бироқ бу қанчалик муваффақиятли бўлганлиги ҳақида ҳали аниқ маълумот йўқ.

20 июнь куни Трамп ўзининг Truth Social ижтимоий тармоғида Нобель Тинчлик мукофоти “фақат либералларга берилгани учун” шунча уринишларига қарамай,  уни олмаслиги ҳақида ўз фикрини билдирди. Ушбу нуфузли мукофотни АҚШнинг бир қанча президентлари олган, уларнинг энг охиргиси 2009 йилда демократ Барак Обама эди.