Покистон Трампни тинчлик бўйича Нобель мукофотига тавсия қилди

Покистон ҳукумати АҚШ Президенти Дональд Трампни 2026 йилги тинчлик бўйича Нобель мукофотига тавсия этди. Бу ҳақда ҳукуматнинг Х ижтимоий тармоғидаги саҳифасида расмий баёнот эълон қилинди.

“Покистон ҳукумати Ҳиндистон-Покистон инқирози даврида кўрсатган қатъий дипломатик аралашуви ва муҳим етакчилиги учун АҚШ Президенти Дональд Трампни 2026-йилги тинчлик бўйича Нобель мукофотига расман тавсия этишга қарор қилди”, дейилади баёнотда.

Покистонлик расмийлар Трампни “катта стратегик тафаккурга ва фавқулодда сиёсий доноликка эга” арбоб сифатида таърифлаган. Трамп уларнинг фикрича, Исломобод ва Нью-Деҳли билан бир пайтда олиб борган дипломатик алоқалари орқали кескинликни камайтиришга эришган.

Эслатиб ўтамиз, жорий йилнинг 7 майига ўтар кечаси Ҳиндистон армияси “Синдур” амалиёти бошланганини эълон қилганди. Бу операция Покистондаги “террористик инфратузилмага” қарши йўналтирилгани билдирилди. Бунга 22 апрель куни Жамму ва Кашмирда жойлашган Паҳалгам шаҳрида юз берган теракт сабаб бўлган. Унда 20 нафардан ортиқ тинч аҳоли ўлдирилган. Ҳиндистон ушбу ҳужумда Покистонни айблади, аммо Исломобод бу даъволарни рад этди.

Теракт учун жавобгарликни Ҳиндистонда террорчи деб тан олинган “Қўзғолончилар фронти” (2019 йилда тузилган) зиммасига олди. У айнан Ҳиндистон томонидан алоҳида мақоми бекор қилинган Жамму ва Кашмир ҳудудида фаол.

10 май куни Дональд Трамп АҚШ воситачилигида томонлар зудлик билан ўт очишни тўхтатишга келишиб олганини эълон қилди. Икки давлат бу келишувни расман тасдиқлади. Орадан икки кун ўтиб, 12 майда Ҳиндистон Бош вазири Нарендра Моди Покистонга қарши ҳарбий амалиётни тўхтатганини билдирди. Покистон эса ўз навбатида “Банян ул-Марсус” номли қарши операциясини якунлаганини эълон қилди.

Покистон ҳукуматининг фикрича, айнан Трампнинг дипломатик аралашуви оғир қуролли тўқнашувнинг олдини олиб, икки ядро қуролига эга давлат ўртасида тинчликни сақлаб қолишга хизмат қилган.