Нима қилсам ҳам уни олмайман – Трамп Нобель ҳақида

АҚШ Президенти Дональд Трамп нима қилса ҳам тинчлик бўйича Нобель мукофотини ололмаслигини маълум қилди. Бу ҳақда у ўзининг Truth Social ижтимоий тармоғидаги саҳифасида ёзди.

Дональд Трамп ўз постида ўн йиллар давомида уруш олиб борган Конго Демократик Республикаси ва Руанда Республикаси ўртасида тинчлик битими тузганини эълон қилди.

“Мен бунинг учун тинчлик бўйича Нобель мукофотини олмайман, Ҳиндистон ва Покистон ўртасидаги урушни тўхтатганим учун ҳам олмайман, Сербия ва Косово ўртасидаги урушни тўхтатганим учун ҳам олмайман, Миср ва Эфиопия ўртасидаги тинчликни сақлаб қолганим учун ҳам олмайман ва Яқин Шарқда Иброҳим келишувини амалга оширганим учун ҳам олмайман. Йўқ, мен тинчлик бўйича Нобель мукофотини олмайман, нима қилмай, ҳатто Россия-Украина ва Исроил-Эрон бўйича қандай натижалар бўлмасин, барибир олмайман. Аммо одамлар буни билишади ва мен учун айнан шу муҳим!” деб ёзган Трамп.

Эслатиб ўтамиз, аввалроқ Покистон ҳукумати Дональд Трампни 2026 йилги тинчлик бўйича Нобель мукофотига тавсия этгани хабар қилинганди. Бунга Трампнинг Ҳиндистон-Покистон инқирози даврида кўрсатган қатъий дипломатик аралашуви ва муҳим етакчилиги сабаб қилиб кўрсатилган. Шунингдек, покистонлик расмийлар Трампни “катта стратегик тафаккурга ва фавқулодда сиёсий доноликка эга” арбоб сифатида таърифлаган.