Мирзиёев ва Лукашенко чанғи учишга борди (фото)

Ўзбекистон Республикаси Президенти Шавкат Мирзиёев ва расмий ташриф билан Ўзбекистонда бўлиб турган Беларусь резиденти Александр Лукашенко “Амирсой” тоғ дам олиш масканига ташриф буюрди. Бу ҳақда Президент матбуот хизмати маълум қилди. 

Қайд этилишича, кеча Тошкентда бўлиб ўтган музокараларда Шавкат Мирзиёев ва Александр Лукашенко маданий-гуманитар йўналишда, шу жумладан спорт ва туризм соҳаларида фаол алмашинувларни давом эттиришга келишиб олган.  

Олий даражадаги учрашувлар якунида бошқа ҳужжатлар қаторида 2024-2025 йилларда Спорт соҳасида ҳамкорлик бўйича дастур ва Туризм соҳасида ҳамкорлик бўйича чора-тадбирлар режаси имзоланган. 

Кейинги йилларда Ўзбекистонда спорт ва туризм инфратузилмасини ривожлантиришга қаратилган йирик лойиҳалар амалга оширилди. Тошкент вилояти Бўстонлиқ туманидаги “Амирсой” тоғ дам олиш маскани шулар жумласидан. Охирги уч йилда бу ерга 4 миллионга яқин сайёҳ келган. 

Жаҳон даражасидаги ҳар мавсумга мос ушбу мажмуага ташриф давомида давлат раҳбарлари спортчилар ва сайёҳлар учун яратилган шароитлар билан танишдилар, икки мамлакат ўртасидаги туризм алмашинувини кенгайтириш юзасидан фикр алмашган. 

Етакчилар мулоқотни тоғ-чанғи трассасида давом эттириб, биргаликда чанғи учган.

Эслатиб ўтамиз, Беларусь расмийси Александр Лукашенко Ўзбекистон Президенти Шавкат Мирзиёевнинг таклифига биноан 7 февраль куни Ўзбекистонга келган. Ўша куни оқшомда Мирзиёев ва Лукашенко Озарбайжон етакчиси Илҳом Алиевга қўнғироқ қилиб, уни президентлик сайловидаги ғалабаси билан табриклади. Шундан сўнг, улар биргаликда хоккей ўйинини томоша қилишга борди.

Кейинроқ Лукашенко Ўзбекистоннинг 3 минг йиллик тарихини ифодаловчи мажмуа билан танишди. Ўзбекистон Президенти Шавкат Мирзиёев кеча, 8 февраль куни эса Беларусь резиденти Александр Лукашенко билан тор доирада ҳамда икки мамлакат расмий делегациялари иштирокида музокара ўтказди ҳамда Кўксаройда тантанали кутиб олиш маросими бўлиб ўтди. Ўзбекистон ва Беларусь ўртасида ўндан ортиқ ҳужжатлар имзоланди.