МАКнинг пўстагини қоққан Умарова, фарзандини ҳожатхонага ташлаган она изоҳи, АҚШдаги даҳшатли сув тошқини ва бошқа муҳим хабарлар

9 июль куни ҳам ниҳоясига етиб қолди. Қуйида бугуннинг энг муҳим воқеаларига қисқача тўхталамиз.

Жамият

Қораўзакда туғилган уч эгизак ўғилга исм танлашда “анъана”дан воз кечилди. Энди Сobalt нима бўлади?

Қорақалпоғистон Республикасининг Қораўзак туманида 7 июль куни учта эгизак фарзанд дунёга келди. Маълум қилинишича, ҳозирда уч эгизак ва уларнинг онасининг ҳолати жуда яхши.

Хабарингиз бор, кейинги пайтларда учта туғилган эгизакларга Шавкат, Миромон, Мирзиё исмларини қўйиш ва уларнинг ота-онасига Сobalt автомобилининг берилиши урфга айланиб бораётган эди. Аммо, Қораўзакда туғилган эгизакларнинг ота-онаси Руслан Базарбаев ва Гулсара Есенбаевалар болаларга яхши ниятлар билан Ҳабибулла, Ҳамидулла ва Халилулла деб исм қўйган.

Фарзандларимиз денгизни кўрмай ўтиб кетади – Азиза Умарова МАКнинг пўстагини қоқди

Шу кунларда “Ўзбекистон ҳаво йўллари”га нисбатан танқидлар яна авжига чиққан. Smartgov Consulting бюроси ижрочи директори, жамоатчиликка ижтимоий тармоқлардаги постлари билан яхши таниш бўлган тадбиркор Азиза Умарова ҳам Facebook’даги саҳифасида “Ўзбекистон ҳаво йўллари”нинг пўстагини қоққан. “Монополия: Ва яна Ҳаво йўллари” номли пост қолдирган Умарова.

Тошкентга келтириладиган янги метро вагонлари намойиш этилди

Бундан бир неча ой аввал, “Ўзбекистон темир йўллари” АЖ ва Россиянинг “Метровагонмаш” АЖ ўртасида Тошкент шаҳридаги ер усти метрополитени учун ҳаракатланувчи ҳар бири 4 вагондан иборат 5 та метро поездини харид қилиш бўйича шартнома имзолангани ҳақида хабар берган эдик. 

“Ўзбекистон темир йўллари” АЖ Россиядан етказиб берилаётган янги вагонларнинг суратини тақдим этди.

Олий маълумотли фуқароларнинг ҳарбий хизматни ўташ муддати узайтирилмоқда

Олий маълумотли фуқароларнинг ҳарбий хизматни ўташ муддати узайтирилади. Олий Мажлис Қонунчилик палатасидаги “Адолат” СДП фракциясининг навбатдаги йиғилиши бўлиб ўтган. Унжа бир қатор қонун лойиҳалари кўриб чиқилган. 

Жумладан, “Умумий ҳарбий мажбурият ва ҳарбий хизмат тўғрисида”ги Ўзбекистон Республикасининг Қонунига ўзгартиш ва қўшимчалар киритиш ҳақида”ги қонун лойиҳаси депутатлар томонидан биринчи ўқишда муҳокама қилинган.

Киндигини қўлим билан уздим, кейин ташлаб юбордим – Фарзандини ҳожатхонага ташлаган она (видео)

Аввалроқ, Сурхондарё вилоятининг Денов туманида аёл ўз фарзандини бозор ҳожатхонасида дунёга келтириб, сўнг уни ўша ҳожатхонага ташлаб кетгани ҳақида хабар берган эдик. 

1999 йилда туғилган фуқаро Ф.Т. асли Сурхондарёнинг бошқа туманида истиқомат қилади. У Деновдаги “Хабибобод” бозорига куёвига кийим олгани боргани, ўша вақт бирдан оғриқ бўлиб, тўлғоқ тутганини айтди.

Саида Мирзиёева Ўзбекистоннинг имижидан хавотирда! У Бош вазир ўринбосари билан учрашди

Хабарингиз бор, бир неча ҳафта аввал Самарқанд ЮНЕСКОнинг маданий мерослар рўйхатидан чиқарилиши мумкинлиги ҳақида хабарлар тарқалган эди.

ЮНЕСКОнинг Бутунжаҳон мероси қўмитасининг (БМҚ) Озарбайжон пойтахти Баку шаҳрида ўтган 43-сессиясида Ўзбекистон томонининг “Бухоронинг тарихий маркази” ва “Самарқанд – маданиятлар чорраҳаси” объектларининг сақланганлиги тўғрисида тақдим қилган ҳисоботлари кўриб чиқилди. Шундан сўнг, Самарқанд шаҳри Хавф остида бўлган бутунжаҳон мероси рўйхатига киритилмади. Шундай бўлсада, Ўзбекистондаги тарихий шаҳарларнинг дунё маданий мероси рўйхатидан чиқарилиши билан боғлиқ хабарлар мамлакатнинг туризм салоҳияти ва жаҳонда тутган имижига ўзининг салбий таъсирини ўтказмай қолмади. 

Диққат, абитуриентлар! 5 та ОТМга 24 соат давомида ҳужжат топшириш мумкин бўлди

Абитуриентларга Давлат хизматлари марказлари орқали олий таълим муассасаларида 24 соат давомида рўйхатдан ўтиш имконияти яратилди. Эндиликда, ДХМ орқали ҳужжат топшириладиган ОТМларга ҳужжатларни куннинг 24 соати давомида, ўзингизга қулай бўлган вақтда топшириш имконига эгасиз! Вақтни бесамар сарфламанг!

Олам

Гулнора Каримованинг Франциядаги активлари Ўзбекистонга қайтарилади

Франция Ўзбекистон Республикасининг Биринчи Президенти Ислом Каримовнинг тўнғич қизи Гулнора Каримовага тегишли активларни Ўзбекистонга қайтаради.

Бугун, 9 июль куни Гулнора Каримованинг Франциядаги мулкларини мусодара қилиш бўйича қарор кучга кирган. Каримованинг Франция бўйлаб учта мулки бўлган. Булар, Париждаги квартира, Сен-Тропедаги вилла ва Париж атрофидаги қаср. Уларни сотишдан тушган пуллар Ўзбекистон бюджетига қайтарилади.

Оғир иқтисодий танглик: сиёсий ўйинлар жабрини халқ чекмоқда

Туркияда иқтисод ҳамон оғир аҳволда қолмоқда. Мамлакатда Президент Ражаб Тойиб Эрдўғаннинг партиясига бўлган ишонч тобора пасайган. Буни Истанбул раҳбарлигига ўтказилган қайта сайловда ҳам мухолиф партия номзоди Экрем Имомўғлунинг ғалаби қилганида ҳам кўриш мумкин. Мамлакатнинг иқтисодий жиҳатдан энг фаол ва энг кўп аҳолига эга бўлган кенти мухолиф партия қўлига ўтди. 

Эрдўған бошчилигидаги Туркия мана икки йилдан ошдики, АҚШ билан тортишиб келмоқда. АҚШга нисбатан кескин айбловлар, очиқдан-очиқ ҳақоратлар мамлакатда долларнинг ошиб кетиши ва турк лирасининг қадрсизланишига сабаб бўлди. Туркияда банклар кредит беришдан қўрқиб қолди, иқтисодий танглик юзага келди, инфляция миқдори юқорилаб бормоқда. 

АҚШда сув тошқинлари кузатиляпти. Трамп қароргоҳи ҳам тошқиндан бебаҳра қолмади (фото)

АҚШ пойтахти Вашингтон, унга ёндош Мэриленд ва Виржиня штатларида кучли ёмғир ёғиши натижасида сув тошқинлари кузатиляпти. Бу ҳақда ABC нашри хабарберди.

Маълум бўлишича, жала сабаб АҚШ Президенти қароргоҳи Оқ уй ертўласига ҳам сув тошган. Ижтимоий тармоқларда Оқ уйдан олинган суратлар ҳам тарқалди. Бундан тақшари АҚШ Миллий архиви биноси ҳам ёпилган.

Одам савдосида айбланган ўзбекистонлик Россияда қўлга олинди

Россиянинг Новосибирск шаҳридаги Толмачёв номидаги аэропортда Ёқутистонга учаётган рейсга рўйхатдан ўтиш вақтида трапспорт полицияси 32 ёшли Ўзбекистон фуқаросини қўлга олди. 

Россия ИИВ Сибир федерал округи бўйича Транспорт бошқармасининг хабар беришича, эркак Ўзбекистонда халқаро қидирувга берилган. Терговдан яшириниш мақсадида Россияга қочиб кетган.

Спорт

Хитойликлар Бэйлга 70 млн евро маош таклиф қилмоқда

Мадриднинг “Реал” клуби ва Уэлс терма жамоаси ҳужумчиси Гарет Бэйлга Хитой клубларидан қизиқиш мавжудлиги маълум қилинди.

Хориж ОАВнинг хабар беришича, хитойликлар футболчига ҳафтасига 1,3 млн, йилига салкам 70 млн евро маош таклиф қилишган. Агар футболчи бунга розилик берса, айни пайтда ишлаб топаётган пулидан 2 баробар кўп маблағга эга бўлади.

Даврон Файзиев ЎФА матбуот ва медиа департаментига раҳбар бўлди

Бугун, 9 июль куни ЎФА матбуот ва медиа департаментига янги директор тайинланди. Эндиликда таниқли шархловчи, ўзбек журналистикасида ўз ўрнига эга, хусусан, спорт журналистикасида ном қозонган Даврон Файзиев ЎФА матбуот ва медиа департаментига раҳбарлик қилади.

Маълум қилинишича, бу тайинлов Ўзбекистон футбол ассоциациясининг ОАВ билан ишини янада самарали йўлга қўйиш, матбуот ва медиа департаменти иш фаолиятини яхшилаш, терма жамоалар ва ўзбек футболига оид янгилик ва хабарларнинг тезкорлик билан холис тарзда етказиб берилишини таъминлаш мақсадида амалга оширилган.

“Олимпия куни” тадбирларида 2,5 млн ўзбекистонлик иштирок этди

Хабарингиз бор, жорий йилнинг 6 июль куни Ўзбекистонда “Олимпия куни” катта байрам сифатида кенг нишонланди. Эътиборлиси, мамлакат тарихида ҳали бундай катта масштабдаги спорт тадбири ўтказилмаган.

Тадбир 6 июль санасига белгиланган бўлса-да, мазкур байрамни нишонлаш республикадаги вилоятларда бир неча кун муқаддам бошланиб кетган эди. Жумладан, дастлаб Бухоро вилояти Арк қўрғонида “Олимпия куни” доирасида 10 минг киши иштирокида оммавий спорт тадбири ўтказилди.