Кулеба ҳамкасбларидан Россия билан музокараларда емай-ичмай ўтиришни сўради

Украина Ташқи ишлар вазири Дмитрий Кулеба Россия билан музокараларда иштирок этмоқчи бўлган ҳамкасбларига ҳеч нарса еб-ичмасликни, иложи бўлса, юза қисмдаги нарсаларга тегмасликни тавсия қилди. Бу ҳақда у “Украина 24” телеканалига берган интервьюсида сўз очган. 

Қайд этилишича, ушбу огоҳлантириш кеча, 28 март куни бир қатор оммавий ахборот воситаларида март ойи бошида россиялик миллиардер Роман Абрамович ва Россия-Украина музокараларининг бошқа иштирокчилари заҳарлангани ҳақида хабар берганидан кейин янграган.

Кўплар, шу жумладан Америка разведкаси вакиллари ҳам мумкин бўлган заҳарланиш ҳақидаги хабарларга шубҳа билан муносабатда бўлган. 

Маълумот учун, бугун, 29 март куни Истанбулда Россия-Украина музокараларининг навбатдаги раунди бошланди. 

Аввалроқ, Россия ва Украина ўртасида жорий йилнинг 3 март куни бўлиб ўтган музокараларнинг бир неча иштирокчисида кимёвий қурол қўлланганидан кейин бўладиган заҳарланиш аломатлари борлиги ҳақида хабарлар тарқалганди. Жорий йил 4 мартга ўтар кечаси музокараларнинг учта иштирокчисида, жумладан, тадбиркор Роман Абрамовичда ҳам юқоридаги аломатлар кузатилгани ҳақида хабар бергандик.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.