Киевни жанг майдонида жиддий ўзгаришлар кутаётгани айтилди

Олам 16211
image

Жорий йил охиригача жанг майдонида Украина фойдасига жиддий ўзгаришлар юз беради. Бу ҳақда Украина Мудофаа вазири Алексей Резников “Financial Times” нашрига берган интервьюсида айтиб ўтди. 

“Жорий йил охиригача жанг майдонида Украина фойдасига катта ўзгаришлар бўлади. Умид қиламанки, бу йил биз қарши ҳужум кампаниясини кўрамиз ва у муваффақиятли бўлади”, дейди вазир. 

Унинг қайд этишича, Киевга қўшимча ракета ва артиллерия бериш Украинанинг Россия кучларини қарши ҳужумда қайтаришга уриниши учун муҳим роль ўйнайди.

“Менимча, бу босқичма-босқич ҳаракат. Биз уларга (русларга – таҳр.) ундан (Ғарб қуроллари – таҳр.) аниқлик ва нозиклик билан фойдаланишимиз мумкинлигини кўрсатамиз ва фронтнинг кенгроқ диапазонини қамраб оламиз”, дейди Резников. 

Шунингдек, у Украинага аллақачон топширилган Ғарб қуроллари собиқ совет давридаги Украина артиллериясидан узоқроқ ва аниқроқ эканлигини ҳамда мамлакат шарқида украиналик ҳарбийлар орасида қурбон бўлганлар сонини камайтиришга ёрдам беришини таъкидлади. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Qalampir.uz Tahririyati
Мақолага баҳо беринг
Баҳолаганлар: 42
Рейтинг: 3.1
t
×