Кавказликлар Путинга суиқасд уюштирди – Украина разведкаси

Олам 39937
image

Жорий йилнинг 24 февралида бошланган кенг кўламли урушдан сўнг кавказликлар Россия Президенти Владимир Путинга суиқасд уюштирди. Воқеа тахминан икки ой олдин содир бўлган. Бу ҳақда Украина Мудофаа вазирлиги разведка бошқармаси бошлиғи Кирилл Буданов “Украйинска правда” газетасига берган интервьюсида айтди.

Будановнинг сўзларига кўра, Владимир Путиннинг Украинада ҳарбий махсус операция ўтказиш ҳақидаги қарори сабаб кавказликлар унга ҳужум қилган.  Бироқ улар Путиннинг соқчилари томонидан зарарсизлантирилган, суиқасд уюштирганларнинг кейинги тақдири номаълум.

Украина разведкаси раҳбарининг таъкидлашича, воқеа тахминан икки ой олдин содир бўлган ва Путин суиқасд пайтида ҳеч қандай тан жароҳати олмаган.

“Кавказликлар томонидан Путинга суиқасд уюштирилди. Бу оммавий бўлмаган маълумот. Мутлақо муваффақиятсиз суиқасд, лекин бу ҳақиқатан ҳам содир бўлди. Бу тахминан 2 ой олдин эди. Яна бир бор айтаман, бу муваффақиятсиз бўлди”, дейди Буданов.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Юлдуз Абдурашидова
Мақолага баҳо беринг
Баҳолаганлар: 1197
Рейтинг: 3
t
×