Қодиров россияликларни сафарбарликка чақирди

Ҳозир Россияда сафарбарликка эҳтиёж йўқ, лекин руслар ўзларини сафарбар қилиб, Президент Владимир Путин атрофида бирлашиши керак. Чеченистон раҳбари Рамзан Қодиров “Знание” бирлашмаси томонидан ўтказилган “Янги уфқлар” марафонида шундай фикр билдирди.

“Менга сафарбарлик бўлиши тўғрими, деб жуда кўп саволлар беришади (Украинадаги “махсус операция” муносабати билан – таҳр.). Мен жавоб ҳеч ким сафарбарлик эълон қилиши керак эмаслигини, барчамиз ўзимиз сафарбар бўлишимиз ва бирлашишимиз, Президентими атрофда туришимиз ҳамда давлатимиз хавфсизлигини таъминлашимиз керак дейман. Бу ватанпарварлик”, деган Қодиров марафондаги чиқишида.

Қодировнинг айтишича, Донбассни “ҳимоя қилиш бўйича махсус операция” 100 фоиз бажарилмоқда.

“Менда ҳарбий амалиёт бор. Ҳозир биз 100 фоиз режа бўйича кетяпмиз ва Украинани бу шайтонлардан озод қиламиз”, деган у.

Чеченистон раҳбарининг айтишича, айни дамда вазият тинч. 

“Президент олдимизга қўйган [вазифаси] бўйича биз режани бажараяпмиз. Биз 100 фоизга бажаряпмиз”, деган у яна бир бор.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.