Қодиров Лисичанск тўлиқ босиб олинганини маълум қилди

Олам 10609
image

Чеченистон раҳбари Рамзан Қодиров Украина шарқидаги Лисичанск шаҳри тўлиқ босиб олинганини маълум қилди. Бу ҳақда у ижтимоий тармоқдаги саҳифасида ёзиб қолдирган. 

"Украиналик сиёсатчилар, таниқли журналистлар ва ҳарбий экспертларнинг баланд овозда баёнотлари ва ёрқин хулосалари бир зумда барбод бўлди. Лисичанск босиб олинди!", дейди Қодиров.

Унинг сўзларига кўра, шаҳар кўчалари бўйлаб чечен ҳуқуқ-тартибот идоралари ходимлари бўлган автомобиллар карвони ҳаракатланишни бошлаган. 

“Бизнинг баннерларимиз кўчалар ва шаҳарнинг бош майдонида осиб қўйилган, чунки улар Россиянинг эркинлиги, қудрати ва буюклигини ифодалайди”, дея қўшимча қилган Чеченистон раҳбари.

Эслатиб ўтамиз, жорий йилнинг 30 июнь куни Украина Қуролли Кучларининг Лисичанск ва унинг атрофида жойлашган бўлинмалари чекинишни бошлаганди. 

Шундан сўнг, Россия иттифоқчи кучлар Лисичанскга етиб келишгани ва уч кун ичида улар Лисичанск нефтни қайта ишлаш заводини, "Матросская" кони ва желатин заводи устидан назорат ўрнатганини маълум қилганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Диёра Абдураҳмoнова
Мақолага баҳо беринг
Баҳолаганлар: 44
Рейтинг: 3.2
t
×