ISW Россия урушда қайси ҳудудларни эгаллашга бел боғлаганини маълум қилди

Американинг Урушни ўрганиш институти (ISW) энг фаол ҳарбий ҳаракатлар олиб борилаётган, шунингдек, Украинага қарши урушда Россия Федерацияси учун устувор бўлган йўналишларни маълум қилди.

ISW ҳисоботида қайд этилишича, босқинчилар ва украиналик ҳарбийлар қуйидаги ҳудудларда фаол кураш олиб бормоқда: Харьков шаҳри ва Харьков вилоятининг шимоли-шарқий қисми Изюм-Славянск линияси бўйлаб; Сиверско-Лисичанский тумани; Бахмут; Авдеевка-Донецк шаҳарлари ҳудуди; Украина жануби.

ISW’нинг таъкидлашича, бу жойлашувлар Кремль ўз қўшинларини Бахмут атрофида ва эҳтимол Сиверскда олдинга бошлашни маъқул кўраётганидан далолат беради, шу билан бирга “ДХР” деб аталмиш кучларнинг фаоллигидан фойдаланиб, 2014 йилдан бери улар Авдеевка йўналишида улар эгаллай олмаган эриша олмаган ҳудудларни эгаллашга ҳаракат қилмоқда.

Изюм ва Славянск атрофида кўнгиллилар батальонларининг кўп тўпланиши бу ҳудуд Россиянинг диққат марказида эмаслиги ва украиналикларнинг қарши ҳужумларига дош беролмаслигин кўрсатади.

Ҳисоботга кўра, Херсон вилояти ва унинг атрофида Украина Қуролли Кучларининг тўпланиши, айниқса, уларнинг қарши ҳужумни давом эттириши, Россия қўмондонлиги ва назорати учун жиддий қийинчиликлар туғдириши мумкин. Шу билан бирга, ISW жанубий йўналиш бўйлаб рус қўшинларининг таркиби бошқа йўналишларга қараганда нисбатан хилма-хил эканини таъкидлаган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Европа мамлакатлари аллақачон Россия нефтини етказиб беришни алмаштиришни бошлаган. Мисол учун, май ойининг охирида Бирлашган Араб Амирликлари икки йиллик танаффусдан сўнг Европага нефть етказиб беришни тиклади.