Эпштейнга қизларни топиб берганликда гумонланган агент ўлик ҳолда топилди

Америкалик молиячи ва жинсий жиноятларда айбланган Жеффри Эпштейн учун ёш аёлларни топиб берганликда гумон қилинган моделлар агенти Даниел Сиад Франциядаги уйида ўлик ҳолда топилди. Бу ҳақда “France 24” хабар берди.

Қайд этилишича, 69 ёшли Швеция фуқароси Даниел Сиаднинг жасади жорий йилнинг 20 июль куни Франциянинг Коломб шаҳридаги уйидан топилган. Ҳозирча унинг ўлими сабаблари номаълум бўлиб, ҳолат юзасидан тергов бошланган.

АҚШ Адлия вазирлиги эълон қилган Эпштейн ҳужжатларида Сиаднинг исми 2 090 марта тилга олинган. Тергов материалларига кўра, у Францияда Жеффри Эпштейн учун ёш аёлларни топиб берганликда гумон қилинган.

2026 йил май ойида BFMTV’га берган интервьюсида Даниел Сиад Жеффри Эпштейнни танишини ва унга ёш аёлларни таништирганини инкор этмаган. Бироқ у буни фақат профессионал фаолияти билан боғлаб, Эпштейннинг шахсий ҳаёти ҳақида ҳеч нарса билмаслигини таъкидлаган.

Аввалроқ эълон қилинган ҳужжатларда Самарқандда туғилган ўзбекистонлик аёлнинг ҳам Эпштейн билан ёзишмалари ва алоқалари қайд этилгани маълум бўлганди. Ҳужжатларда у Эпштейндан моддий ёрдам олгани ва унинг айрим танишлари билан учрашувларга тайёрлангани қайд этилган.

Сиадга нисбатан беш нафар аёл зўрлаш ва жинсий зўравонлик бўйича шикоят қилган. У эса барча айбловларни рад этиб, умри давомида ҳеч кимни зўрламаганини билдирган. Адвокатининг айтишича, Даниел Сиад бир неча бор тергов органларидан ўзини сўроқ қилишни сўраган, бироқ у шу пайтгача бирор марта ҳам расмий равишда сўроқ қилинмаган.

Адвокат Меня Араб-Тигриннинг айтишича, суд-тиббий экспертиза хулосаси эълон қилинмагунча Даниел Сиаднинг ўлими сабаблари ҳақида хулоса қилишга шошилмаслик керак. Шунингдек, у мижозига нисбатан ҳеч қачон расмий айблов эълон қилинмаганини ва унинг айбсизлигини доимо таъкидлаб келганини билдирган.

Эслатиб ўтамиз, Америкалик молиячи Жеффри Эпштейн 2019 йил август ойида Нью-Йоркдаги қамоқхонада ўлик ҳолда топилган. Жорий йил бошида АҚШ Адлия вазирлиги Эпштейн ишига оид минглаб саҳифалик янги ҳужжатларни эълон қилганди. Шунингдек, Эпштейннинг ҳуқуқий вориси ва унинг икки ҳамкори қарийб 40 нафар жабрланувчига 35 миллион долларгача компенсация тўлашга келишиб олган эди.