“Энг ёмони ҳали олдинда”. Путиннинг суҳбатини олган Макрон хавотирли башорат қилди

Россия Президенти Владимир Путин Франция етакчиси Эммануэль Макрон билан телефон орқали суҳбатлашди ва Украина расмийларининг музокараларни кечиктиришга уринишлари Москванинг янги талабларини пайдо қилишини таъкидлади. Бу ҳақда Кремль матбуот хизмати хабар берган.  

“Путин Киев вакиллари билан музокаралар контекстидаги фундаментал ёндашувлар ва шартларни батафсил баён қилди”, дейилган хабарда. 

Шу билан бирга, Путин Макроннинг Франция халқига мурожаатида айтилган кўплаб фикрларга қўшилмаслигини таъкидлаган. 

“Бу, хусусан, Эммануэль Макроннинг Россия Украинада нацизмга қарши курашаётгани ҳақидаги “ёлғон” баёнотига тааллуқлидир. Шу муносабат билан Киевнинг давлат сиёсатида неонацистларнинг муҳим роли ҳақида асосли тушунтиришлар берилган”, дейилган матбуот хизмати хабарида. 

Россия раҳбари гуманитар муаммоларни ҳал қилишда хорижий ҳамкорлар билан ишлашга тайёрлигини тасдиқлаган ва Макронни хорижликларни Украинадан хавфсиз эвакуация қилиш учун саъй-ҳаракатларни бирлаштиришга чақирган. 

“Хусусан, Украина хавфсизлик кучлари томонидан гаровга олинган Харьковдаги ҳиндистонлик талабаларнинг катта гуруҳи ҳақида гап борди. Эммануэль Макрон Киев раҳбарияти билан тегишли ишларни олиб боришга ваъда берди”, дея қўшимча қилган Кремль. 

Путин россиялик ҳарбийлар тинч аҳоли ҳаётини сақлаб қолиш учун ҳамма нарсани қилаётганини таъкидлаган.

“Юқори аниқликдаги қуроллар фақат ҳарбий инфратузилмани йўқ қилиш учун қўлланилади. Давом этаётган ракета ҳужумлари ва Киев ва Украинанинг бошқа шаҳарларини бомбардимон қилиш ҳақидаги даъволар ҳақиқатга тўғри келмайди, улар Россияга қарши дезинформация кампанияси элементлари ҳисобланади”, деган Президент. 

Путин Россия “миллатчилик тузилмалари жангариларига” қарши муросасиз курашни давом эттиришини қўшимча қилган. 

“Махсус ҳарбий операция топшириқлари ҳар қандай ҳолатда ҳам бажарилиши, музокараларни чўзиш орқали вақт ютишга уриниш бизнинг музокара позициямизда Киевга қўшимча талаблар қўйишга олиб келиши таъкидланди”, дейилган Кремль хабарида.

Макрон Путин билан музокарадан сўнг Украинадаги вазият янада ёмонлашиши мумкинлигини айтган. 

“Республика Президенти энг ёмони ҳали олдиндалигини айтмоқда, Путиннинг ҳеч бир гапи ишонтирмаганини ҳисобга олсак, у қатъий эди”, дейилган Франция манбаси хабарида.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.