Бельгияда тураржой биноси ёниб кетди. Қурбонлар бор

Бельгиянинг Антверпен шаҳрида жойлашган кўп қаватли тураржой биносида чиққан кучли ёнғин оқибатида бир неча киши ҳалок бўлди. Бу ҳақда маҳаллий полиция хабар қилди.

Маълумотларга кўра, ёнғин ҳақидаги хабар маҳаллий вақт билан бугун, 1 июль куни соат 09:53 да келиб тушган. Ёнғин Антверпеннинг Линкерувер туманидаги 10 қаватли турар жой биносининг саккизинчи қаватида бошланган. Полициянинг билдиришича, ёнғин чиққан бино тўлиқ эвакуация қилинган. У ерда 200 нафардан ортиқ киши яшаган. Ҳодиса оқибатида бир неча киши турли даражада жароҳат олган.

Маҳаллий полиция вакили Ким Бастианс ҳозирча ҳалок бўлганлар ва жабрланганлар сонига аниқлик киритиш имкони йўқлигини билдирган.

“Айни пайтда бу ҳақда рақамларни айта олмаймиз, чунки ҳозирги устувор вазифамиз жабрланганларни қидириш ва қутқариш ишларини давом эттиришдан иборат”, деган у.

Қайд этилишича, ҳодиса жойида турли туманлардан жалб этилган ўт ўчириш бўлинмалари, тез ёрдам бригадалари ва бошқа фавқулодда хизматлар иш олиб бормоқда. Полиция тутун тарқалган ҳудуд аҳолисидан эшик ва деразаларни ёпиш, зарур ҳолларда эса шамоллатиш тизимларини ўчириб қўйишни сўраган.

Бинонинг ўнинчи қаватида яшовчи Геерт Деюлфнинг айтишича, дастлаб электр энергияси ўчган, ортидан ёнғин сигнализацияси ишга тушган.

“Аввалига электр ўчди. Уч дақиқадан кейин ёнғин сигнализацияси ишлади. Ўша пайтга келиб йўлакларни тутун қоплаб бўлганди. Биз ўз кучимиз билан пастга тушишга уриндик, аммо бунинг имкони бўлмади. Кейин хонадон ичида беркиниб, айвонда кутдик. Тахминан ўн дақиқадан сўнг ўт ўчирувчилар махсус нарвон орқали бизни қутқариб олишди”, деган у.

Эслатиб ўтамиз, аввалроқ Москва шимолидаги қурилаётган бинода чиққан ёнғин оқибатида саккиз киши ҳалок бўлган, яна 13 киши жароҳатланган эди.