АҚШ ва Россия вакиллари Вашингтонда музокара ўтказади

Россия тўғридан тўғри инвестициялар жамғармаси раҳбари Кирилл Дмитриев шу ҳафта Вашингтонга бориб, АҚШ Президентининг махсус вакили Стивен Уиткофф билан учрашиши мумкин. Бу ҳақда манбаларга таяниб, CNN телеканали хабар берди.

Дмитриевнинг ташрифи юқори мартабали россиялик мулозимнинг 2022 йилдан буён музокаралар учун АҚШ пойтахтига илк бор ташрифи бўлиши мумкин. Таъкидланишича, учрашув Россия ва АҚШ ўртасидаги муносабатларни мустаҳкамлаш ва Украинадаги можарога барҳам бериш йўлларини топишдан иборат бўлади.

CNN хабарига кўра, АҚШ ҳукумати Дмитриевга қарши санкцияларни Давлат департаменти унга мамлакатга кириш визасини бериши учун тўхтатган.

Маълумот учун, март ойи охирида Дмитриев “Известия” нашрига Россия ва АҚШ нодир ер металлари лойиҳалари бўйича музокараларни бошлаганини айтганди.

Эслатиб ўтамиз, 18 февраль куни Саудия Арабистони пойтахти Ар-Риёдда Россиядан Ташқи ишлар вазири Сергей Лавров, Президент ёрдамчиси Юрий Ушаков ва Россия тўғридан тўғри инвестициялар жамғармаси раҳбари Кирилл Дмитриевдан иборат Россия делегацияси АҚШ вакиллари билан музокара ўтказганди. Учрашувда АҚШ Давлат котиби Марко Рубио, АҚШ Президенти Дональд Трампнинг миллий хавфсизлик бўйича маслаҳатчиси Майк Уолтц ва Трампнинг Яқин Шарқ бўйича махсус вакили Стив Уиткофф иштирок этди. Дмитриев Саудия Арабистонида икки томонлама музокаралар бошланишидан олдин Америка нефть компаниялари Россияга қайтиши мумкинлиги, Кремль ҳам АҚШ билан Арктикадаги қўшма лойиҳалардан манфаатдор эканини айтганди. Кейинчалик Россия Президенти Владимир Путин Кирилл Дмитриевни халқаро иқтисодий ҳамкорлик бўйича махсус вакил этиб тайинлади.