АҚШ Украинани қўллаб-қувватлаш учун Конгрессдан ёрдам сўради 

Америка Қўшма Штатлари Президенти Жо Байден Конгрессдан Украинага гуманитар ва ҳарбий ёрдам сифатида 33 миллиард доллар сўради. Бу ҳақда бугун, 28 апрель куни эълон қилинган Оқ уйнинг ёзма баёнотида сўз борган.

Улар Украинага хавфсизлик ва ҳарбий ёрдам, шунингдек, АҚШнинг НАТО иттифоқчилари билан ҳамкорликда Европа хавфсизлигини мустаҳкамлашга қаратилган саъй-ҳаракатларини молиялаштириш учун 20,4 миллиард доллар жўнатмоқчи. 8,5 миллиард доллар Украина иқтисодиётини қўллаб-қувватлашга, 3 миллиард доллар эса гуманитар ёрдамга йўналтирилади.  

Суҳбатдошларнинг сўзларига кўра, гап қўшимча артиллерия, танк ва ҳаво ҳужумига қарши қуролларни топшириш, киберхавфсизликни яхшилаш, ҳаво ҳужумидан мудофаа тизими, миналардан тозалаш тизимлари ҳақида бормоқда.  

Байденнинг илтимоси АҚШнинг Украинага сарфлаган жами харажатларини 9 ой ичида 39 миллиард долларга етказишига қарамай, республикачилар ва демократлар орасида кенг қўллаб-қувватланиши кутилмоқда.

Аввалроқ, Жо Байден Конгрессга россиялик ишбилармонлар билан боғлиқ мулкларни мусодара қилиш ва ундан тушган маблағни Украинани қўллаб-қувватлашга сарфлаш бўйича таклифлар юбораиши айтилган эди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.