Зеленский яҳудийларни Россияга қарши қайрайдиган нутқ қилди

Украина фуқаролари урушнинг дастлабки етти кунида 30 йиллик мустақиллик давридан кўра кўпроқ бирлашди. Бу ҳақда Президент Владимир Зеленский халқига йўллаган видеомурожаатида айтиб ўтди.

“Саломатлик тилайман, бирдам юрт! Мен тасодифан бирдам демадим. Бу даҳшатли урушнинг еттинчи куни бошланди. Биз бирдек ҳис қилаётган уруш. Бу вақт ичида 30 йилдагидан кўра кўпроқ бирлашдик. Аввалига биз бирдек қўрқдик. Кейин бирдек оғриқли бўлди, лекин ҳозир ҳаммаси бир хил. Ғалабадан, ҳақиқатдан, биз эришмоқчи бўлган тинчликдан, осойишталикдан, биз ташвишланаётган халқимиз ҳаётидан ва Украинадан ташқари... Бу вақт ичида биз ҳақиқатан ҳам бир бутун бўлдик. Биз бир-биримизни кечирдик. Бир-биримизни яхши кўрдик. Биз бир-биримизга ёрдам беряпмиз. Бир-биримиз учун қайғуряпмиз”, деган Украина Президенти видеомурожаатида.

Президент яна бутун дунёдаги яҳудийларини Россиянинг Бабий Ярга ракета ҳужумига жавоб беришга чақирди.

“Шундай жойни ракета нишонига айлантириш учун ким бўлиш керак? Сизлар Холокост қурбонларини иккинчи марта ўлдиряпсиз. Совет даврида Бабий Ярнинг ҳақиқий тарихини ўчириш учун савдо маркази ва спорт клуби, ёрдамчи бинолар ҳамда боғ қуришди. Нега энди бомбардимон қилишди? Бу инсонийлик чегарасидан чиқиш. Бундай ракета зарбаси Россиядаги кўп одамлар учун бизнинг Киевимиз бутунлай бегона эканини кўрсатади. Пойтахтимиз, тарихимиз ҳақида ҳеч нарса билишмайди, лекин уларга тарихимиз, юртимиз, барчамизни йўқ қилиш буйруғи берилган”, деган Зеленский.

У душман ҳаддан ташқари қаҳрли эканини таъкидлаган. Тунда рус қўшинлари Киевда украиналикларни бомбардимон қилди, кейин Бабий Ярни ракета билан урди.

“Бутун дунё “бошқа ҳеч қачон” деб ваъда қиляпти. Тарихимизни, жаҳон тарихини биладиган ҳар қандай оддий одам учун Бабий Яр Киевнинг алоҳида қисми, Европанинг алоҳида қисми, ибодат жойи, бу тепаликларда ўлдирилган юз минглаб одамлар хотираси масканидир”, дея қўшимча қилган Президент.

“Укринформ” хабарига кўра, Киевдаги телеминорани уриб туширишда фойдаланилган Россия ракетаси Бабий Ярга келиб тушган. 

Баби Яр— Киевнинг шимоли-ғарбий қисмида, Лукяновка ва Сирец туманлари оралиғидаги тракт бўлиб, у ерда Иккинчи Жаҳон уруши вақтида тинч аҳоли, асосан яҳудийлар, лўлилар, шунингдек, совет ҳарбий асирлари, нацистлар томонидан қатл этилган.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ ва Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.