Навоийда алиментдан қочган ота тандир ичидан топилди (видео)

Навоий вилоятининг Кармана туманида 2 йил давомида алимент тўламай 71 млн сўм қарз бўлган ота тандир ичидан топилди. Бу ҳақда Навоий вилояти судлари хабар берди.

Қайд этилишича, Мажбурий ижро бюроси Кармана туман бўлими иш юритувида мавжуд фуқаролик ишлари бўйича Кармана туманлараро судининг 2023 йилдаги суд қарорига асосан алимент тўловчи шахс икки йилдан буён алимент жавобгарлигидан қочиб келган. Бу давр мобайнида унинг қарздорлиги қарийб 71 миллион сўмга етган. Шу сабабли иш қидирув шўъбасига тақдим қилинган.

Тезкор тадбир жараёнида ушбу шахс Кармана туманидаги ошхоналардан биридаги тандир ичидан топилган. Шундан сўнг ҳолат бўйича тегишли ҳужжатлар расмийлаштирилган ва суд қарори билан қарздор отага нисбатан 15 сутка маъмурий қамоқ жазоси тайинланган.

Эслатиб ўтамиз, аввалроқ Фарғонада алимент тўлашдан қочиб, парда ортига яширинган ота қамалганди. Ўтган йили Қашқадарёда алимент тўламасдан қочиб юрган эркак уйидаги кўрпалар тагидан, Наманганда ва Сурхондарёда уй ертўласидан, Хоразмда товуқ фермасидан, Фарғона шаҳрида тунги клубдан, Андижонда холасининг ва Бухорода бувисининг уйидан топилганди. Шунингдек, илгарироқ Сурхондарё вилоятида вояга етмаган бир фарзандининг моддий таъминоти учун алимент тўлашдан бўйин товлаган ота укасининг никоҳ тўйида ушланганди. Андижон вилоятида эса алимент тўлашдан қочиб юрган ота ўз уйининг қурилиши тугалланмаган ҳудудида, шифер ортидан топилган. Самарқанд вилоятида эса алимент тўлашдан қочиб юрган ота шкаф ичидан чиққан.