Франция АҚШдан Озодлик ҳайкалини қайтаришни сўради (видео)

Кеча, 16 март куни Европарламентнинг франциялик депутати Рафаэль Глюксманн АҚШнинг “авторитар режимларни қўллаб-қувватловчи” сиёсатига норозилик рамзи сифатида Озодлик ҳайкалини Францияга қайтаришга чақирди. Бу ҳақда “Politico” хабар берди.

Глюксманнинг айтишича, 1886 йилда Нью-Йоркда француз халқи совғаси сифатида қабул қилинган Озодлик ҳайкалини ортга қайтариш керак, чунки Қўшма Штатлар “золимлар томонида туришга қарор қилган”. 

“Биз уни сизга совға қилдик, лекин сиз ундан нафратланаётганга ўхшайсиз”, деган Глюксманн.

Унинг фикрича, АҚШ авторитар режимларни қўллаб-қувватлаш ва илм-фан мустақиллигини талаб қилувчи олимларни ишдан бўшатиш орқали эркинлик рамзини қадрламай қўйган.

Глюксманнинг таъкидлашича, ҳайкални қайтариш таклифи АҚШнинг Украинага ёрдамни тўхтатиш қарори билан боғлиқ. Кейинчалик ёрдам қайта тикланган бўлса-да, Европада кўпчилик АҚШнинг Россияга нисбатан юмшоқ позициясидан ва Украина Президенти Владимир Зеленскийнинг омма олдида камситилишидан хавотирда.

Депутат, шунингдек, Трамп маъмурияти сиёсати туфайли АҚШда ишини йўқотиши мумкин бўлган олимларни ҳам Францияга қабул қилишни таклиф қилган.

Унинг фикрича, Франция АҚШнинг глобал кучга айланишига ҳисса қўшган бундай мутахассисларнинг кўчиб ўтишидан фойда кўриши мумкин.

Маълумот учун, Озодлик ҳайкали француз ҳайкалтароши Огюст Бартольди томонидан яратилган ва 1886 йил 28 октябрда Америка мустақиллигининг 100 йиллиги муносабати билан АҚШга совға қилинган. У 1885 йил 17 июнда Франциянинг Изере кемасида Нью-Йорк бандаргоҳига етказилган. Ҳайкални ташиш учун 350 қисмга бўлиб, 214 қутига қадоқлашган ва тўрт ой ичида янги асосда йиғишган. Ёдгорликда шоира Эмма Лазаруснинг “Янги Колосс” сонетининг қаҳрамони тасвирланган – у оёғи билан синган занжирларни ушлаб турибди, ўнг қўлида машъалани, чап қўлида эса АҚШ Мустақиллик декларацияси қабул қилинган сана ёзилган лавҳани ушлаб турибди.

1984 йилда Озодлик ҳайкали UNESCO'нинг Бутунжаҳон мероси рўйхатига киритилган.

Эслатиб ўтамиз, кеча, 16 март кунидан бошлаб “Америка овози” ва “Озодлик радиоси” ўз фаолиятини тўхтатгани ҳақида хабар берилганди. “Америка овози” вакиллари 1,3 мингдан ортиқ журналист, продюсер ва радио ходимлари таътилга чиқарилгани ҳақида электрон хат олган. Ушбу ёпилиш 15 март куни Дональд Трамп “Озодлик” радиоси ва “Америка овози” нашрлари, шунингдек, яна олти федерал агентлик фаолиятини назорат қиладиган АҚШ Глобал медиа агентлигини (USAGM) тугатиш тўғрисидаги фармонни имзолагандан сўнг юзага келган.