“Сити” мухлислари ЎФАдан норози

“Манчестер Сити” клуби мухлислари Ўзбекистон футбол ассоциациясини кескин танқид қилмоқда. Улар жамоанинг Instagram саҳифасида ўзбекистонлик ҳимоячи Абдуқодир Ҳусанов ҳақида жойланган пост остида ЎФАга мурожаат ёзиб қолдирмоқда.

“Ўзбекистон футбол ассоциацияси, Абдуқодир Ҳусанов билан боғлиқ вазиятларда унинг хавфсизлигига эътибор қаратмаяпсиз. Шуни унутмангки, Ҳусановнинг хавфсизлигига айнан сиз жавобгарсиз. Ижтимоий тармоқларда тарқалаётган видеолардан кўриниб турибдики, унинг атрофини кўплаб таниган ва танимаган инсонлар ўраб олган. Бу футболчини яхшигина чалғитяпти ва асабийлашишига сабаб бўлмоқда. Унинг хавфсиз ва назорат остида бўлишини таъминлаш сизнинг бурчингиз. Хоҳ Ўзбекистонда бўлсин, хоҳ терма жамоа билан хориж сафарларига чиққанида бўлсин, унинг хавфсизлигига жавобгарсиз. Ҳусановнинг бўш вақтини беҳуда нарсаларга сарфламанг. Эътиборини ортиқча нарсаларга чалғитманг ва футболчилик фаолияти доимо биринчи ўринда бўлсин. Сизларнинг бундай бошқарувингиз ва эътиборсизлигингизни шунчаки қабул қилиб бўлмайди. Ишингизни яхшироқ бажаришга ҳаракат қилинг”, деб ёзилади изоҳда.

Маълумот ўрнида, Ҳусанов 17 март куни Ўзбекистон миллий терма жамоаси таркибида ўйинларда иштирок этиш учун Тошкентга етиб келганди. Дастлаб, у 20 март куни “Бунёдкор” стадионида бўлиб ўтган Ўзбекистон-Қирғизистон ўртасидаги ўйинда майдонга тушди. Миллий терма жамоа сафидаги навбатдаги ўйин 25 март куни Теҳронда Эронга қарши бўлади. Шунингдек, “Манчестер Сити” футболчининг терма жамоа йиғинидан Манчестерга қайтиши учун алоҳида самолёт ҳам ажратган эди.

Эслатиб ўтамиз, аввалроқ, 21 ёшли Абдуқодир Ҳусановга Тошкентга келиши билан Улуғбек Асанбоев томонидан Ҳусанов Mercedes-Benz G-класс, яъни “Гелик” автомобили совға қилингани ҳақида хабар берилган эди.