Japarov Turkiya bilan mudofaa va xavfsizlik bo‘yicha hamkorlikni kuchaytirishni xohlayapti

Olam 2599
image
-

Qirg‘iziston tomoni Turkiya bilan mudofaa va xavfsizlik sohasida hamkorlikni rivojlantirishni istamoqda. Bu haqda Qirg‘iziston Respublikasi Prezidenti Sadir Japarov Turkiya Respublikasi Parlamenti raisi Mustafo Shentop bilan uchrashuvda so‘z ochgan. 

Tomonlar Anqaradagi Buyuk Millat Majlisida o‘tgan uchrashuvda mintaqadagi xavfsizlik, terroristik tashkilotlarga qarshi kurash, qirg‘iz-tojik chegarasida ro‘y bergan holatni muhokama qilganlar. 

Shentop 2016 yil 15 iyulda Turkiyada harbiy to‘ntarishga urinish paytida Turkiya parlamenti binosiga havo hujumlari uyushtirilgani, Fathullloh Gulen boshchiligidagi terrorchilar Parlament binosiga uchta bomba tashlaganini xotirlagan.

“Xalqimiz 2016 yil 15 iyulda nodavlat notijorat tashkilotlar, ta’lim va tijorat muassasalari niqobi ostida o‘zining haqiqiy niyatlarini yashirib kelgan ushbu terroristik tashkilotning haqiqiy yuzini ko‘rdi. Sud jarayoni shuni ko‘rsatdiki, o‘sha kecha Parlamentga bomba tashlagan uchuvchilar, biz begunoh bolalarimizni ishonib topshirgan maktab va kollej o‘qituvchilaridan buyruq olgan. 

FETOning asosiy e’tibori Turkiyaga qaratilgan bo‘lsa-da, ular o‘zlari faoliyat olib borayotgan barcha mamlakatlarga tahdid soladi, deb hisoblaymiz. Shu ma’noda, biz ikki mamlakat Prezidentlari kecha o‘tgan uchrashuvlarda FETOning har ikki mamlakat xavfsizligiga tahdid solayotgani borasida kelishuvga erishilganidan mamnun bo‘ldik”, deydi Shentop. 

O‘z navbatida Qirg‘iziston Prezidenti Bishkek Anqara bilan yaqin hamkorlikni rivojlantirishda davom etishini bayon etgan. 

“Biz Qirg‘izistondagi turk fuqarolarining, xususan, tadbirkorlarning huquqlarini himoya qilish uchun qo‘limizdan kelganicha harakat qilamiz”, degan davlat rahbari. 

Shuningdek, uchrashuvda yaqinda qirg‘iz-tojik chegarasida ro‘y bergan holatga ham e’tibor qaratilgan. 

Parlament raisi Mustafo Shentop Botken viloyatidagi davlat chegarasining qirg‘iz-tojik qismida sodir bo‘lgan voqealar paytida halok bo‘lganlarning yaqinlariga hamdardlik bildirgan va jarohatlanganlarga tezroq sog‘ayib ketishlarini tilagan. 

Shuni ta’kidlab o‘tish o‘rinliki, Turkiyaning bir necha chaqiriqlariga qaramay, rasmiy Bishkek Qirg‘izistonda faoliyat yuritayotgan Fathulloh Gulen boshchiligidagi FETO terroristik tashkiloti ta’lim muassasalarinining faoliyatiga panja ortidan qarab kelayotgan edi. Erdo‘g‘an bugungacha ushbu masalalarda sobiq Prezidentlar Almazbek Atamboyev va Sooronbay Jeenbekov bilan ham muloqot qilgan. Biroq, natija bo‘lmagan. 

Ma’lumot o‘rnida, 2016 yilning 15 iyul kuni Turkiyada davlatga qarshi to‘ntarishga urinish amalga oshirildi. Unda mamlakat xavfsizlik kuchlari, ichki ishlar, prokuratura, Milliy xavfsilik xizmati, Kurolli kuchlar, mudofaa tizimlariga o‘rnashib olgan kimsalar Erdo‘g‘an boshchiligidagi Hukumatga qarshi to‘ntarishni amalga oshirib, Prezidentni hokimiyatdan ag‘darishni maqsad qilgan edi. To‘ntarishga urinishlar xalqning ko‘chalarga chiqib, mamlakat demokratiyasini himoya qilishi bilan bostirildi. Oqibatda 251 nafar begunoh insonlar qurbon bo‘ldi. 

Ushbu davlat to‘ntarishiga harakat ayni damda AQSHning Pensilvaniya shtatida istiqomat qilib kelayotgan Fathulloh Gulen boshchiligidagi FETO terroristik guruhi va uning davlatdagi korchalonlari orqali amalga oshirilgani ma’lum qilindi. Turkiya Hukumati to‘ntarishga urinishdan so‘ng Fathulloh Gulen va u boshchiligidagi tashkilotga qarshi murosasiz kurashni boshladi.

Qalampir.uz Tahririyati
Maqolaga baho bering
Baholaganlar: 40
Reyting: 3.1
t
×