Zelenskiy Gretsiyada Ursula fon der Lyayen bilan uchrashadi

Ukraina Prezidenti Vladimir Zelenskiy Gretsiyaga yetib keldi. Zelenskiy u yerda Yevropa komissiyasi rahbari Ursula fon der Lyayen va G‘arbiy Bolqon davlatlari yetakchilari bilan uchrashadi. Bu haqda u o‘zining ijtimoiy tarmoqdagi sahifasida ma’lum qildi.

Zelenskiyning yozishicha, u Gretsiya Prezidenti Katerina Sakellaropulu va Bosh vazir Kiriakos Mitsotakis bilan ham uchrashadi. 

Qayd etilishicha, bugun, 21 avgust kuni Gretsiya Bosh vaziri o‘z qarorgohida G‘arbiy Bolqon mamlakatlari va YeIga a’zo davlatlar rahbarlari bilan Yevropa Ittifoqini kengaytirishga bag‘ishlangan norasmiy kechki ovqatda uchrashadi. Uchrashuvda Serbiya va Chernogoriya Prezidentlari Aleksandr Vuchich va Yakov Milatovich, Shimoliy Makedoniya Bosh vaziri Dimitar Kovachevskiy, (tan olinmagan) Kosovo bosh vaziri Albin Kurti, Bosniya va Gersegovina hukumat rahbari Boryana Kristo, Bolgariyadan Bosh vazir Nikolay Denkov, Xorvatiya Bosh vaziri Andrey Plenkovich va Ruminiya Bosh vaziri Marchel Cholaku ishtirok etishi kutilmoqda. Taklifni Yevropa Komissiyasi rahbari Ursula fon der Lyayen va Yevropa Kengashi rahbari Sharl Mishel ham qabul qilgan.

Eslatib o‘tamiz, oldinroq Zelenskiy Shvetsiya, Niderlandiya va Daniyaga borgan va davlatlar rahbariyati bilan uchrashgandi. Shvetsiyada CV90 jangovar mashinasini Ukrainada ishlab chiqarish bo‘yicha,  Niderlandiya 42 ta F-16 qiruvchi samolyotini, Daniyada 19 ta F-16 qiruvchi samolyotini Kiyevga topshirish bo‘yicha kelishuvlarga erishildi.