Yun Sok Yol yana so‘roqqa bormadi

Bugun, 25 dekabr kuni Janubiy Koreya prezidenti  Yun Sok Yol qisqa muddatli harbiy holat e’lon qilgani bo‘yicha o‘tkazilayotgan so‘roq chaqiruviga borishni yana rad etdi. Bu haqda “Yonhap” xabar berdi.

Ma’lum qilinishicha, siyosatchi harbiy holat e’lon qilinishi yuzasidan ochilgan ish doirasida 25 dekabr kuni so‘roq qilishga chaqirilgan. Markaziy razvedka boshqarmasiga ko‘ra, davlat rahbari bir kun avval so‘roqqa chaqiruv qog‘ozi olgan. U isyonchilikka urinish va mansabni suiiste’mol qilishda ayblanmoqda.

“Hozirda Korrupsiya bo‘yicha yuqori martabali amaldorlarni tergov qilish boshqarmasi Yunning kun davomida so‘rovga javob berishi ehtimolini kutmoqda”, deyiladi xabarda.

Kecha, 24 dekabr kuni Yunning advokati prezident konstitutsiyaviy suddagi impichment jarayonini ustuvor hisoblayotganini va Rojdestvo kunidan keyin sud jarayoni bo‘yicha o‘z pozitsiyasini e’lon qilishni rejalashtirayotganini ma’lum qilgan.

Eslatib o‘tamiz, 18 dekabr kuni ham Janubiy Koreya prezidenti Yun Sok Yol belgilangan so‘roq uchun ko‘rsatilgan vaqtda ishtirok etmagandi.