Yevrokomissiya xorijiy agentlar to‘g‘risidagi qonun loyihasini tayyorlayapti

Yevropa Komissiyasi xorijiy agentlar to‘g‘risidagi qonunning Yevropacha versiyasini tayyorlashga kirishdi. Bu haqda bugun, 13 mart kuni Politico nashri xabar berdi.

Qayd etilishicha, so‘nggi kunlarda Yevrokomissiya rahbarining qadriyatlar va shaffoflik bo‘yicha o‘rinbosari Vera Yurova topshirig‘i bilan lobbi va nodavlat tashkilotlar o‘rtasida so‘rov o‘tkazish boshlangan. Unda ushbu tashkilotlar Yevropa Ittifoqi tashqarisidan moliyalashtiriladimi yoki yo‘qmi degan savol o‘rganilgan. Bunday harakat Bryusseldagi shunday tashkilotlar orasida vahima uyg‘otgan. 

Tashkilotchilarning aytishicha, Yevrokomissiyaga bu so‘rov Yevropa Ittifoqi institutlari faoliyatiga chet el aralashuviga qarshi bo‘lajak qonunchilikni ishlab chiqish uchun kerak. Vera Yurova esa bu normalar 2024 yilning kuzida bo‘ladigan Yevroparlamentga saylovlar uchun tayyorlanishi zarur ekanini aytgan.

Turli hisob-kitoblarga ko‘ra, Bryusselda ro‘yxatdan o‘tgan lobbi tashkilotlarida minglab yuqori maosh oladigan xodimlar ishlaydi va bu muassasalarning e’lon qilingan yillik aylanmasi yuzlab million dollarni tashkil qiladi.

Ma’lumot uchun, lobbi tashkilotlari ma’lum bir manfaatlarni ko‘zlab, ba’zan mansabdor shaxslarni sotib olish yo‘li bilan o‘z mijozlarini qo‘llab-quvvatlashga qaratilgan faoliyat yuritadi. Lobbistlar o‘z himoyasi ostidagilarga katta foyda beradigan davlat buyurtmalari, kreditlar, yordamlar, imtiyozlar, litsenziyalar olishda, iqtisodiy va tijorat faoliyatida, yangi korxonalar ochish va uni ro‘yxatdan o‘tkazishda, raqobatchilarni sindirishda qulay sharoitlar yaratishga ko‘maklashadi.

Eslatib o‘tamiz, oldinroq Gruziyada xorijiy agentlar to‘g‘risidagi qonun kun tartibiga chiqqan, buning ortidan esa Tbilisida norozilik namoyishlari avj olgan edi. Namoyishlar fonida qonun loyihasi parlamentda rad etilgandi.