YeI Rossiyaning muzlatilgan aktivlaridan foydalanish rejasiga kelishib oldi

Yevropa Ittifoqi davlatlari muzlatilgan Rossiya aktivlaridan tushgan mablag‘larni Ukrainani qo‘llab-quvvatlash uchun ishlatish rejasini ma’qulladi. Bu haqda Chexiya Tashqi ishlar vaziri Yan Lipavskiy ma’lum qildi.

Uning so‘zlariga ko‘ra, bunday qaror Ukrainaga 2024 yilda uch milliard yevrogacha mablag‘ olish imkonini beradi, uning 90 foizi mamlakatning harbiy ehtiyojlariga yo‘naltiriladi.

“Rossiya o‘zining agressiv urushi tufayli yetkazgan zararni to‘lashi kerak”, deydi vazir.

Bloomberg ma’lumotlariga ko‘ra, YeI rejasi 15 fevraldan keyin olingan daromadlarni Ukrainaga o‘tkazishni nazarda tutadi.

Ushbu sanadan oldin olingan mablag‘lar, masalan, Rossiyadagi qonuniy da’volar bilan bog‘liq har qanday xavflarni qoplash uchun Belgiyaning Euroclear depozitariysida saqlanadi.

Aktivlar yiliga taxminan besh milliard yevro ishlab chiqarishi kutilmoqda, Ukraina esa yiliga ikki marta yordam oladi.

Eslatib o‘tamiz, Qo‘shma Shtatlar yangi mudofaa sanoati jamg‘armasi orqali Ukrainaga qo‘shimcha 2 milliard dollar harbiy mablag‘ ajratishi mumkinligi haqida xabar berilgandi.