Yarim asrdan beri ilk bor: NASA Oyga to‘rt nafar astronavtni yuboradi

Joriy yil 1 aprel kuni AQSH Milliy aeronavtika va kosmik ma’muriyati (NASA) to‘rt nafar astronavtni Oy atrofida parvoz qilish uchun yuborishga tayyorligini e’lon qildi. Agentlik texnik muammolar bartaraf etilgach, yarim asrdan keyingi ilk boshqariladigan parvoz sanasini tasdiqladi. Bu haqda “The New York Times” xabar berdi.

Artemis II missiyasi taxminan o‘n kun davom etadi: ekipaj Oy yuzasiga qo‘nmasdan uning atrofini aylanib chiqadi va Yerga qaytadi. Parvoz Space Launch System (SLS) raketasi yordamida amalga oshiriladi. Ekipaj tarkibiga komandir Rid Uaysmen, uchuvchi Viktor Glover hamda mutaxassislar Kristina Kox va Jeremi Xansen kirgan.

Missiyani aprel oyida uchirish imkoniyati joriy yil fevralda aniqlangan vodorod sizib chiqishi va geliy uzatishdagi muammolar hal qilinganidan keyin paydo bo‘ldi. Muhandislar nosoz zichlagichni almashtirgan va raketani yakuniy tekshiruvlar uchun yig‘ish binosiga qaytargan.

Dastur menejeri Shon Kuinnning so‘zlariga ko‘ra, raketani uchirish maydonchasiga olib chiqish 19 martga rejalashtirilgan.

Uchirish oynasi oltita ehtimoliy sanani o‘z ichiga oladi: 1 apreldan 6 aprelgacha. Agentlik Artemis II sinov parvozi ekanligini, shu sababli u ma’lum xatarlar bilan bog‘liqligini ta’kidlamoqda.

Ma’lumot uchun, Artemis (“Artemida”) dasturi 1972 yilda yakunlangan Apollon (“Apollon”) missiyalarining davomchisidir. Oldingi bosqich – Artemis I, 2022 yil oxirida uchuvchisiz rejimda o‘tkazilgan edi. Keyingi qadam esa Artemis III missiyasi bo‘lib, uning doirasida 2028 yilda Oyning Janubiy qutbi yaqiniga ikki astronavtni qo‘ndirish rejalashtirilgan.

Eslatib o‘tamiz, avvalroq NASA Artemis II missiyasini barcha uchirishdan oldingi protseduralarning yakuniy sinovi paytida yoqilg‘i sizib chiqishi sababli mart oyiga qoldirgandi.