Yana bir mashhur futbolchi Saudiya klubiga o‘tmoqda

Italiyaning “Latsio” klubi yetakchisi Sergey Milinkovich-Savich faoliyatini Saudiya Arabistonida davom ettirishga yaqin turibdi. Bu haqda “SkySport” xabar berdi.

Manbaga ko‘ra, “Al-Hilol” klubi Savich transferi uchun Rim klubiga 40 million yevro taklif qilgan. Saudiya klubidan tashqari Savichga “Inter”, “Milan” va “Yuventus” kabi klublar qiziqish bildirmoqda, biroq Italiyaning hech bir klubi serbiyalik futbolchi transferi uchun “Al-Hilol” kabi katta summa taklif qila olmaydi.

Qayd etilishicha, tomonlar transfer bo‘yicha to‘liq kelishuvga erishgan va tez orada transfer rasman e’lon qilinishi kutilmoqda. 

Ortda qolgan mavsumda Savich “Latsio” safida umumiy 47 ta o‘yinda maydonga tushib, 11 ta gol urdi va 8 ta golga assistentlik qildi. Uning Rim klubi bilan amaldagi shartnomasi 2024 yilga qadar mo‘ljallangan. Savichning transfer qiymati 50 million yevroni tashkil etadi.