Vuchich va Fitsoning sog‘lig‘ida muammolar aniqlandi

Serbiya Prezidenti Aleksandr Vuchich va Slovakiya Bosh vaziri Robert Fitso sog‘lig‘i bilan bog‘liq muammolar tufayli ishchi tashrif va tadbirlarni bekor qildi. Bu haqda Serbiya va Slovakiya OAVlari xabar berdi.

“Tanjug” agentligiga ko‘ra, Vuchich AQSHga tashrifi chog‘ida to‘satdan kasal bo‘lib qolgan va uni erta yakunlagan. Tekshiruvdan so‘ng u Serbiyaga qaytishga qaror qildi. Prezident hali ham harbiy gospitalda qolmoqda; uning kasalligi sabablari haqida keyinroq ma’lum bo‘ladi.

Fitso ham oxirgi daqiqada ishchi dasturini bekor qildi. “Tvnoviny” portalining yozishicha, bunga suiqasddan keyin yuzaga kelgan jiddiy sog‘liq muammolari sabab bo‘lgan. Fitso, xususan, 1 May bayramida ishtirok etishdan bosh tortishiga, Oksford universitetidagi ma’ruzani va Nitra shahridagi novvoyxonada ishlashni keyinga qoldirishiga to‘g‘ri keldi.

Bosh vazir Chexiyaning sobiq prezidenti Milosh Zeman bilan teledasturda ham ishtirok etmadi. Rasmiy manbalar Bosh vazir dasturidagi o‘zgarishlar sabablari haqida ma’lumot bermayapti.

Eslatib o‘tamiz, o‘tgan yilning 15 may kuni Robert Fitsoga Vazirlar Mahkamasi yig‘ilishidan so‘ng yig‘ilganlar oldiga chiqqanida, unga qarata o‘q uzilgan. Oqibatda yaralangan Fitso zudlik bilan shifoxonaga yotqizilgan. Keyinroq Slovakiya Bosh vaziriga nega suiqasd uyushtirilgani haqida xabar berildi. Iyul oyida Fitso suiqasddan so‘ng ilk bor hukumat yig‘ilishida ishtirok etdi.