АҚШга борган Сербия Президентининг тоби қочиб қолди

Кеча, 2 май куни Сербия Президенти Александр Вучич АҚШнинг Флорида штатига қилган ташрифи чоғида кутилмаганда ўзини ёмон ҳис қилиб, сафарини муддатидан олдин тўхтатишга қарор қилди. Шифокорлар билан маслаҳатлашганидан сўнг у АҚШдаги барча режалаштирилган учрашувларини бекор қилиб, Белградга қайтиб кетди. Бу ҳақда РТС телеканали хабар берди.

Президент ватанига қайтган пайтда уни Соғлиқни сақлаш вазири Златибор Лончар ва шифокор кутиб олган. Вучичнинг матбуот хизмати яқин орада давлат раҳбарининг соғлиғи ҳақида жамоатчиликка маълумот беришини билдирган.

РТС'нинг хабар беришича, Вучич америкалик мавқедоши Дональд Трамп ва Республикачилар партиясининг бошқа юқори лавозимли аъзолари билан учрашишни режалаштирган бўлган. Президент АҚШдаги сербиялик тадбиркорлар, Конгресс аъзоси Клаудия Тенни ва Нью-Йоркнинг собиқ мэри Руди Гиулиани билан учрашишга улгурган.

АҚШнинг Ички хавфсизлик департаменти маълумотларига кўра, Вучичнинг аҳволи тушликдан кейин кескин ёмонлашган. Сиёсатчи шифокорлар билан маслаҳатлашиб, уйга қайтишга қарор қилган.

“Политика” газетасининг аниқлик киритишича, сафар давомида Вучич билан бирга Молия вазири Синиша Мали ва оммавий ахборот воситалари бўйича маслаҳатчиси Сюзана Василевич ҳам бўлган.