Vengriya 10 nafar rossiyalik diplomatni mamlakatdan haydamoqchi

Vengriya Rossiyaning Budapeshtdagi elchixonasida faoliyat yuritayotgan 10 nafar diplomatni mamlakatdan chiqarib yubormoqda. Bu haqda Vengriya Tashqi ishlar vaziri Anita Orban ma’lum qildi.

Qayd etilishicha, Vengriya Tashqi ishlar vazirligi vakili Rossiyaning mamlakatdagi elchisini 10 nafar rossiyalik diplomat faoliyati Vena konvensiyasiga muvofiq diplomatik maqomiga mos kelmasligi haqida xabardor qilgan.

Shundan so‘ng, Vengriya hukumati ushbu diplomatlarning mamlakat hududini tark etishini talab qilgan.

Vengriya TIV rahbarining bildirishicha, mazkur qaror mamlakat xavfsizligi va suverenitetini himoya qilishga qaratilgan. Shu bilan birga, diplomatlarning chiqarib yuborilishi Rossiya bilan diplomatik aloqalar uzilishini anglatmaydi.

“Ushbu qaror Vengriya xavfsizligi va suverenitetini himoya qilishga xizmat qiladi. Bu Rossiya bilan diplomatik munosabatlarni uzishni anglatmaydi“, deyiladi xabarda.

Budapesht Moskva bilan o‘zaro hurmat va belgilangan qoidalarga rioya qilish tamoyillari asosida zarur muloqotni davom ettirish niyatida.

Ma’lumot uchun, diplomat maqomiga mos kelmaydigan faoliyat deganda, odatda, diplomatga berilgan vakolat doirasidan tashqaridagi, jumladan, josuslik yoki boshqa noqonuniy faoliyat nazarda tutiladi.

Eslatib o‘tamiz, avvalroq Rossiya dronlari Ruminiya havo hududini bir necha bor buzgani ortidan mamlakat Rossiya elchixonasining bir diplomatini chiqarib yuborgan edi.