Vashingtonda Suriyaning yangi bayrog‘i ko‘tarildi

Vashingtondagi Suriya elchixonasi tepasida ko‘p yillar davomida birinchi marta Suriya Arab Respublikasi bayrog‘i yana ko‘tarildi. Bu haqda SANA axborot agentligi xabar berdi.

Marosimda Suriya tashqi ishlar vaziri Asad Hasan al-Shiboniy ishtirok etdi, u 2014 yil 18 martda yopilgan elchixona ustiga Suriya bayrog‘ini ko‘tardi.

Vazir mazkur voqeani “tarixiy lahza” deb atadi va bayroqning ko‘tarilishi “Suriyaning qonuniyligi va xalqaro maydondagi diplomatik ishtirokining tasdig‘i” ekanini ta’kidladi.

Qayd etish joiz, Suriyada o‘tish davri hukumati 2024 yil 9 dekabrda, Bashar Asad rejimi qulaganidan so‘ng tuzilgan edi. 2025 yil 29 yanvarda mamlakatning eng yuqori qonunchilik organi bo‘lgan Xalq kengashi tarqatib yuborildi va Vaqtinchalik qonunchilik kengashiga saylovlar e’lon qilindi. 2025 yil 29 martda birinchi o‘tish davri hukumati o‘z faoliyatini yakunladi va uning o‘rniga yangi hukumat tuzildi. Ijro hokimiyatini to‘g‘ridan to‘g‘ri prezident boshqaradigan tizim joriy qilindi.

2 fevral kuni Ahmad ash-Shara Saudiya Arabistoniga ilk xorijiy tashrifini amalga oshirdi. Mazkur tashrif doirasida u Ar-Riyodda Saudiya Arabistoni valiahd shahzodasi va Bosh vaziri Muhammad bin Salmon Ol Saud bilan uchrashdi. 3 fevral kuni u Makka shahrida Umra ziyoratini amalga oshirdi. Unga Ka’ba eshiklari ham ochib berildi. Ash-Sharaning 2-xorijiy safari Turkiyaga bo‘ldi. Ash-Shara muzokaralar chog‘ida hukm surgan ijobiy atmosfera uchun Erdo‘g‘anga  minnatdorlik bildirib, Turkiya Prezidentini eng qisqa vaqt ichida Suriyaga tashrif buyurishga taklif qildi. Qolaversa, ash-Shara 11 aprel kuni ham Turkiyaning Antaliya shahrida Antaliya diplomatiya forumi doirasida (ADF 2025) Prezident Rajab Toyib Erdo‘g‘an bilan uchrashgan edi.

7 may kuni Suriyaning yangi muvaqqat rahbari o‘zining birinchi Yevropaga tashrifini Fransiyadan boshladi va mamlakat Prezidenti Emmanuel Makron bilan ikki mamlakat o‘rtasidagi aloqalarni mustahkamlashga qaratilgan uchrashuv o‘tkazdi.

Eslatib o‘tamiz, may oyida AQSH Prezidenti Donald Tramp Saudiya Arabistonida ash-Shara bilan uchrashgan edi. Tramp uchrashuvdan so‘ng uni “qattiqqo‘l inson” va “o‘tmishi kuchli jangchi” deb ta’rifladi. Tramp, shuningdek, Suriyaga nisbatan joriy etilgan sanksiyalarni bekor qilishini e’lon qilib, bunga asos sifatida “mamlakatga imkon berish zarurati”ni ko‘rsatgan edi. Kelasi haftada ash-Shara AQSHga borib, BMT Bosh assambliyasida nutq so‘zlashi kutilmoqda.