“Uzilgan bosh”, quyma oltinlar va bir dunyo qurol-yarog‘. Prigojinning uyidan yana nimalar topildi? (fotoreportaj)

Joriy yilning 24 iyun kuni “Vagner” rahbari Yevgeniy Prigojin harbiy isyon ko‘targan edi. O‘shanda uning uyida tintuv o‘tkazilib, katta miqdordagi pullar va boshqa buyumlar musodara qilingandi. Bugun, 6 iyul kuni bir qator ommaviy axborot vositalarida Prigojinning uyidan tintuv vaqtida olingan tasvirlar paydo bo‘ldi.

“Fontanka” nashri tomonidan e’lon qilingan suratlarda Prigojinning uyidan topilgan bir qator buyumlar, jumladan, ko‘plab orden va medallar taqib qo‘yilgan kiyim, muhim uchrashuvlar paytida eshikka tirab qo‘yiladigan ulkan bosqon (kuvalda) kabilarni ko‘rish mumkin. 

Yana bir e’tiborni tortuvchi buyum devorga osib qo‘yilgan boshi uzilgan terrorchi jasadining tasviri hisoblanadi. Taxminlarga ko‘ra, mazkur surat Suriyada olingan.

Shuningdek, “Fontanka” e’lon qilgan suratlar orasida Prigojinga isyondan roppa-rosa bir yil avval – 2022 yilning 20 iyunida berilgan Rossiya Federatsiyasi qahramoni unvoni sertifikati ham bor.

Bundan tashqari, Prigojinning uyidan COVID pandemiyasi vaqtidan saqlanib qolgan, to‘liq jihozlangan tibbiyot xonasi ham topilgan. Bu yerdagi qurilmalar reanimatsiya va intensiv terapiya bo‘limlarida foydalaniladi.

“Fontanka”dan tashqari “Izvestiya” nashri ham bir qancha suratlarni e’lon qildi. Fotolar orasida uning uyidan topilgan ko‘plab qurol-yarog‘lar, pariklar, ko‘pgina soxta hujjatlar, bir nechta oltin quymalari va katta miqdordagi pullar e’tiborga molik.

Shuningdek, uning xonadonidan fitnes zali va ibodat uchun maxsus xona ham o‘rin olgan.

Kremlga aloqadorligi taxmin qilinadigan anonim Telegram-kanal “Ostorojno, novosti”da esa “Vagner” rahbarining turli obrazlardagi suratlari paydo bo‘ldi. Ularda Prigojin Sudandagi Mudofaa vazirligi xodimi, abu-dabilik diplomat yordamchisi, Beng‘ozidan kelgan katta leytenant ko‘rinishlarida gavdalanadi.

Eslatib o‘tamiz, avvalroq tintuv vaqtida musodara qilingan 10 milliard rubl pullar va boshqa buyumlar Prigojinga qaytarib berilgandi.