O‘zil maydonda ko‘rgan qo‘rqinchli tushini esladi

Yaqinda professional futbolchilik faoliyatini yakunlaganini e’lon qilgan “Real”ning sobiq futbolchisi Mesut O‘zil Ispaniyadagi faoliyati haqida fikr bildirdi. Bu haqda “Marca” nashri xabar berdi.

“O‘ylashimcha, men “El-Klasiko” avjiga chiqqan vaqtda, “Real” va “Barselona” klublari o‘z tarixidagi eng yaxshi davrni o‘tkazayotganda, Yevropa Chempionlar ligasi yarim finalida “Barselona”ga qarshi maydonga tushganman. Mourino Gvardiola, Ronaldu-Messi  qarama-qarshiligi hammaning yodida bor. Hozir “El-Klasiko” oldingi shiddati va hayajonini yo‘qotdi, keyinchalik “Barselona” ustidan qozonilgan g‘alaba xuddi oddiy holatdek tuyula boshlandi. 2010 yilda 0:5 hisobida “Barselona”ga mag‘lub bo‘lish – maydonda ko‘rayotgan qo‘rqinchli tushga o‘xshardi. Men “Real”da ko‘p o‘yin o‘tkazdim, ko‘plab derbilarda ishtirok etdim, lekin menimcha, hech qaysi o‘yin “El-Klasiko”ga teng bo‘la olmaydi”, deydi O‘zil.

2010 yilning yozida 21 yoshli Mesut O‘zil “Verder”dan 15 million yevro evaziga “Realga o‘tgandi. Nemis yarim himoyachisi Ispaniyada uchta sovrinni qo‘lga kiritdi: chempionat bosh sovrini (2012), Ispaniya kubogi (2011) va superkubogi (2012).