O‘zbekistonlik bokschi WBA kamari uchun jang qiladi

O‘zbekistonlik professional bokschi Otabek Xolmatov navbatdagi jangini Butunjahon boks assotsiatsiyasi (WBA) kamari uchun o‘tkazadi. Xolmatovning chempionlik jangiga WBA rasman buyruq berdi.

Yarim yengil vazn toifasida chempionlik jangini Xolmatov amerikalik Raymond Fordga qarshi o‘tkazadi. Ikkala bokschi ham 30 kun vaqt davomida jang sanasi bo‘yicha kelishib olishi kerak, agar tomonlar murosaga kela olmasa jang tashkilotchiligi bo‘yicha promouterlik savdosi o‘tkaziladi.

Aslida Xolmatov kamar uchun britaniyalik Ley Vudga jang qilishi kerak edi, biroq Vud 7 oktyabrdagi jangidan so‘ng kamarni bo‘shatishga qaror qildi

“WBA jangni har bir da’vogar uchun 50 foiz pul mablag‘ini ajratish bilan kim oshdi savdosiga qo‘yishi mumkin”, deyiladi tashkilot xabarida.

Ma’lumot uchun, Otabek Xolmatov profboksdagi barcha – 11 ta jangida g‘alaba qozongan. U 11 ta jangining 10 tasida raqiblarini nokautga uchratgan.