O‘zbekistonda koronavirusdan sog‘ayganlar 500 nafarga yaqinlashdi

Jamiyat

image

Bugun, 23 aprel kun Toshkentdagi Virusologiya ilmiy-tekshirish instituti klinikasida 2 nafar, Surxondaryo viloyati yuqumli kasalliklar shifoxonasidan esa 1 nafar, Buxoro viloyatidan bugunning o‘zida yana 6 nafar, jami 9 nafar bemor butkul sog‘aydi. Ular mas’ullar ishtirokida reabilitatsiyaga kuzatildi.

Virusologiya ilmiy-tekshirish instituti klinikasida sog‘ayganlarning 1 nafari (ayol) 54 yoshda, Toshkent shahridan. Yana bir nafari (erkak) esa Toshkent viloyatidan, 25 yoshda. Ular koronavirusga chalinganlar bilan muloqotda bo‘lib, infeksiya yuqtirib olgan.

Surxondaryoda tuzalgan bemor (erkak) esa 31 yoshda bo‘lib, Sirdaryo viloyatidan. U joriy yil 27 mart kuni charter reys bilan Rossiyadan Termiz shahriga kelgan va karantinga olingan. Kasallik aniqlangach, shifoxonaga yotqizilgan.

Shuningdek, Buxoro viloyatida sog‘ayganlarning 3 nafari Toshkent shahridan, 2 nafari Namangan viloyatidan bo‘lsa, 1 nafari Buxoro viloyatidan. Ularning yoshi kattasi 62 yoshda, eng yoshi kichigi esa 21 yoshda. Samarali davolash muolajalaridan keyin, so‘nggi tekshiruvlar ularda infeksiya yo‘qligini ko‘rsatdi.

Ayni paytda mamlakat bo‘ylab koronavirus infeksiyasidan butunlay sog‘ayganlar hozircha  495 nafarni tashkil etmoqda.

Eslatib o‘tamiz, O‘zbekistonda koronavirusni yuqtirib olish bilan bog‘liq ilk holat joriy yilning 15 mart kuni qayd etilgan edi. Ayni vaqtgacha virus yuqtirganlar 1716 nafarni tashkil qilyapti. Bugungacha bemorlarning 7 nafari vafot etgan.  

Qadrli yurtdoshlar, karantin davrida zarurat bo‘lmasa, ko‘chaga chiqmang. Vaqtni oilangiz, farzandlaringiz davrasida o‘tkazing. Unutmang,  #UydaHayotBor


Maqola muallifi

Teglar

Koronavirus O'zbekistonda

Baholaganlar

46

Reyting

3.1

Maqolaga baho bering

Doʻstlaringiz bilan ulashing